Балаҕан ыйын 7 күнүгэр «МаМалыш» оҕо күүтэр дьахталлар VII бэстибээллэрэ ыытылынна. Быйылгы бэстибээл Дьокуускай куорат 385 сылын уонна «Ыччат. Дьиэ кэргэн, Спорт. Чөл олох» муниципальнай бырагыраама чэрчитинэн тэрилиннэ.
edersaas.ru
Бэстибээл ыытыллар кэмигэр оҕо күүтэр эдэркээн ийэлэр Дьокуускай куорат сүрүн исписэлиистэриттэн – акушердартан, гинекологтартан уонна педиатрдартан туһалаах сүбэлэри-амалары ыллылар. Ону сэргэ ЗАГС, Дьокуускай к. нэһилиэнньэ социальнай көмүскэлин, үөрэх управлениеларын, биэнсийэ фондатын отделениетын үлэһиттэрэ кытыннылар.
Эдэр ийэлэр «Ползуноктар», «Дьиктини күүтэбит», «Супер аҕа!», «Дорообо, кырачаан!», «Fashion-Mama», «Телепузиктар» куонкурустарга көхтөөхтүк кытыннылар.
Куонкурустар түмүктэринэн кыттааччыларга уонна кыайыылаахтарга «Байер», «Гедеон Рихтер» хампаанньалартан, «Baby Nest» илиинэн үлэ устуудьуйатыттан, «Ньюборн» саҥа төрөөбүт оҕолор студияларыттан, «Ийэ буолуом» оҕо күүтэр дьахталларга аналлаах таҥас маҕаһыыныттан, «Синнабон» кафеттан, «Хэнд Мэйд» Юлиана Ким студиятыттан, «Гармония» доруобуйа кииниттэн, СӨ аҕаларын лигатыттан, Дьокуускай куорат эмтиир тэрилтэлэриттэн уо.д.а бириистэр туттарылыннылар.
Бэстибээл ыалдьыта, СӨ ресторатордарын уонна отельердарын ассоциациятын шеф-повара Александр Можаров оҕо күүтэр дьахталлар туһалаах аһылыктарыгар маастар-кылаас ыытта. Маннык бэстибээл сыл аайы ыытыллара туһалааҕын үрүҥ халааттаах аанньаллар эрэ буолбакка, ийэ-аҕа буолбут эдэр төрөппүттэр бигэргэтэллэр.
Надежда ЕГОРОВА, «Саха сирэ» хаһыат, edersaas.ru