Куораппытыгар бэйдиэ сылдьар ыт сүрүн кыһалҕаҕа кубулуйан эрэр. Ол курдук хас биирдии кыбартаал ахсын бэйдиэ сылдьар ыт ахсаанын киһи сиппэт. 2014 сыллаахха Тиксиигэ бэйдиэ сылдьар ыттар оҕоҕо саба түһэннэр өлөрбүттэрин туһунан ынырык сурах өрөспүүбүлүкэни тилийэ көппүтэ. Сокуон иннигэр Тиксии бөһүөлэгин дьаһалтатын баһылыга эппиэтинэһи сүкпүтэ. Ол сыл ыты дьиикэй кыылга тэҥниир сокуон олоххо киирбитэ. Ол эрээри, күн бүгүнүгэр диэри ити кыһалҕа быһаарылла илик. Бэйдиэ сылдьар ыттары, куоскалары тутуунан дьарыктанар «Жилкомсервис” тэрилтэҕэ биир кэлим диспиэтчэрскэй сулууспаттан сайаапкалар киирэллэр. Оччотугар тоҕо ыт ахсаана аччаабатый?
edersaas.ru
Бу соторутааҕыта, 203 микрооройуоҥҥа иккис кылаас үөрэнээччитигэр ыт саба түстэ. Бу эрэ буолбатах, Автодорожнай уокурукка эмиэ бу ааспыт күһүн оҕоҕо ыт саба түспүтүн туһунан сурах баара. Тоҕо бэйэбит олорор куораппытыгар ыт саба түһүө диэн куттаммакка холкутук сылдьар кыаллыбатый?
Бэйдиэ сылдьар ыттан эмсэҕэлээбит оҕо ийэтэ Кристина Дмитриева маннык кэпсээтэ:
— Бу быһылаан бэҕэһээ, сэтинньи 20 күнүгэр, буолла. Икки оҕом, иккис уонна үһүс кылаас уолаттара оскуолаларын таһыгар ыт саба түспүт. Ыт эмискэ ырдьыгынаабытынан кыра уолум атаҕар түспүт, онтон илиититтэн ытырбыт. Таҥаһа халыҥ буолан хотуппатах. Убайа куттанан сатаан оҕотун көмүскээбэтэх. Оҕолорум кыл түгэн иһигэр оҕолор оонньуур былаһааккаларын диэки нэһиилэ куоппуттар. Онно тиийэн ханаакка тахсан хаһан ыт барыар диэри турбуттар. Ыты барда дии санаан ханааттан түһэн оскуолаларын диэки баран истэхтэринэ, ыттара иккистээн сырсан кэлбит, хата, атын дьоҥҥо, оҕолорго аралдьыйбыт кэмигэр оскуолаларыгар киирбиттэр. Киһи хомойуоҕа, оскуола тула киһи бөҕөтө сылдьыбыт. Биир да киһи көмөлөспөтөх, ыты үүрбэтэх. Уопсайынан, куорат дьаһалтата тоҕо бэйдиэ сылдьар ыттарга болҕомто уурбата буолла? Оҕолорбутун оскуолаҕа ыытан баран долгуйан инньэ үрдүгэр олорор курдукпут.
Билигин ыт саба түһүүтүн иһин эппиэтинэһи ким сүгэр? Бэйдиэ сылдьар ыттар, аатыгар да этиллэринии бэйдиэ сылдьаллар. Куорат ханнык уокуругар сылдьалларын киһи чопчу эппэт.
Автодорожнай уокурук салайааччытын солбуйааччы Иван Степанов:
— Биир кэлим диспиэтчэрскэй сулууспаҕа, ону таһынан биһиги уокурукпутугар киирбит сайаапкалары биһиги «Жилкомсервис» тэрилтэҕэ тиэрдэбит. Тиэрдэн баран хайаатар даҕаны дьыалабытын тиһэҕэр тиэрдэргэ дьулуһабыт. Бэйдиэ сылдьар ыттары хайдах, төһөнү туталларын көрөөрү, бэрэбиэркэлиир сыалтан барсааччыбыт. Бу соторутааҕыта киирбит сайаапкаларынан биһиги уокурукпутуттан 20-чэ ыты туппуттара. Ыты тутуу биллэн турар, уустук үлэ. Аан бастаан утутуохха наада, онтон утуйбуттарын кэннэ хомуйан, ыты быстах кэмҥэ тутар Очиченко уулуссаҕа баар сиргэ илдьиллэр.
Ульяна ЗАХАРОВА.