Дьокуускайга Петр Алексеев аатынан уулуссаҕа гаас утаҕын ыам ыйын 30 күнүгэр диэри уларытыахтара
Дьокуускай куорат дьиэлэригэр гааһы тиэрдэр магистральнай ситим лаппа эргэрэн турара биллэр. 50 сыллааҕыта тардыллыбыттар эргэрэллэрэ чуолкай буоллаҕа.
Александр ТАРАСОВ, «Саха сирэ» хаһыат, edersaas.ru
Хампаанньа салалтата Дьокуускай куорат гааһын ситимин саҥардар былааны оҥорон, быйыл кулун тутар ыйтан саҕалаабыта. Кулун тутар 20 күнүттэн Петр Алексеев аатынан уулусса Пирогов уонна Лермонтов аатынан уулуссалар быһа охсуһуһуутугар баар учаастактарыгар үрдүк баттааһыннаах гаас утаҕын саҥардан оҥоруу бара турар. Ону тимир көлөлөөх дьон бары билбит буолуохтааххыт. Тоҕо диэтэххэ, ити учаастак сабыллан турар.
Станислав Луковцев, «Сахатранснефтегаз» АУо гааһы тарҕатар управлениетын кылаабынай инженерин солбуйааччы:
– Петр Алексеев аатынан уулусса Пирогов – Лермонтов учаастагар баар 500 диаметрдаах, 510 м уһуннаах магистральнай гаас утаҕын ыам ыйын 30 күнүгэр диэри уларытан түмүктүөхпүт. Бүгүн учаастакка сыбааркалыыр икки биригээдэ, сири хаһар үс биригээдэ уонна түөрт экскаватор үлэлии сылдьаллар. Бу үлэ уулуссаны өрөмүөннүөхтээх «Доррис» ААУо графигын кытта учуоттаан ыытыллар. Ол эбэтэр, кинилэр Петр Алексеев уулуссаны оҥорон, асфаллыахтарын иннинэ биһиги ситими оҥорон үмүрүтүөхтээхпит.
Александр ТАРАСОВ, «Саха сирэ» хаһыат, edersaas.ru