Дьокуускай куорат 2-с нүөмэрдээх оскуолатын дириэктэрэ Алексей Семенов ананар үһү диэн сурах бүгүн социальнай ситимнэри толордо.
edersaas.ru
Дьокуускай куорат мэрэ Сардаана Авксентьева, бэҕэһээ куорат оскуолаларын дириэктэрдэрин кытта көрсүһүүтүгэр, «үөрэх управлениетын начаалынньыгынан ананыан сөптөөх кандидатураҕытын киллэриҥ» диэн эппитэ. Ити дуоһунаска Семеновы көрөллөрүн туһунан быыбар быдан инниттэн сурах иһиллибитэ. Ол эрэн, этэргэ дылы, куоракка былаас уларыйан, саҥа мээр атын киһини көрүөн сөп балаһыанньата үөскээбитэ. Сардаана Авксентьева Алексей Семеновы аныырга сөбүлэспитэ бүгүн иһилиннэ.
Алексей Семеновы кытта төлөпүөнүнэн сибээстэһэ сырыттыбыт.
Кини «Эдэр саас» сайтка манныгы эттэ:
— Иккис нүөмэрдээх оскуолаҕа дириэктэринэн анаммытым лоп курдук 10 сыл буолла. Ол иннинэ, Дьокуускай куорат национальнай гимназиятыгар учууталынан, дириэктэри солбуйааччынан, уопсайа, сэттэ сыл үлэлээбитим. Онон начаалынньык дуоһунаһыгар сөбүлэһэҕин дуо, диэбиттэригэр сөбүлэҥмин биэрбитим.
Оттон кини оннугар 2-с оскуола дириэктэринэн ким ананыай диэн үгүс төрөппүтү долгутар ыйытыыга хоруй ылаары туоһуласпыппар: “Уон сыл тухары үгүс үлэни ыыттым, медиастудия тэрилиннэ, скалодром аһылынна… Ити ыыппыт саҕалааһыным халтай хаалбакка, салҕаныан баҕарабын. Ким дириэктэринэн ананыан билигин чопчу этэр кыаллыбат эрээри, биһиги оскуолабытыгар дириэктэринэн быһаччы сыһыаннаах, бииргэ үлэлэһэр киһибит буолуон баҕарабын”, — диэн эттэ.
Ыспыраапка:
Семенов Алексей Климентьевич
1975 сыллаахха атырдьах ыйын 27 күнүгэр төрөөбүтэ.
1992 с. – Убайаан (Ньурба) оскуолатын бүтэрбитэ.
1997 с. — Саха судаарыстыбаннай университетын физикаҕа бакылтыатын бүтэрбитэ.
2001-2008 сс. – Дьокуускай куорат Национальнай гимназиятын учуутала, дириэктэри солбуйааччы.
2008-2018 сс. – Дьокуускай куорат 2-с №-дээх национальнай политехническэй оскуолатын дириэктэрэ.
РФ үөрэҕириитин бочуоттаах үлэһитэ, СӨ альпинизмҥа уонна скалолазаниеҕа федерациятын бэрэсидьиэнэ.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.