Сарсын, атырдьах ыйын 25 күнүгэр 17.00 чаастан, Дьокуускай куорат Орджоникидзе болуоссатыгар тапталлаах куораппытыгар аналлаах Форум чэрчитинэн сибэкки бэстибээлэ ыытыллар. Бу туһунан куорат дьаһалтатын уопсастыбаннаһы, иһитиннэрэр-көрдөрөр сириэстибэлэри кытары үлэҕэ Департамена иһитиннэрдэ.
Ол курдук, үгэс буолбут «Цветущий Якутск» бэстибээл түмүгүнэн, куонкурус, хаартысканан быыстапка кыайыылаахтарын эҕэрдэлиэхтэрэ. Тэрээһин ыалдьыттарыгар анаан сибэкки арааһын быыстапката, куонкурустар ыытыллыахтара, бэртээхэй кэнсиэр көрдөрүллүө.
Санатан эттэххэ, «Миллион цветов» куонкурус аан бастаан куорат дьаһалтатын көҕүлээһининэн Үлэ сылыгар ыытыллыбыта. Онно сүүһүнэн тэрилтэлэр, урбаанньыттар, оскуолалар, оҕо саадтара, уопсастыбанньыктар, куорат олохтоохторун күүһүнэн өрөспүүбүлүкэбит киин куората күөх үүнээйинэн, эҥинэ бэйэлээх сибэккинэн киэркэйбитэ, тупсубута. Итинтэн ыла үтүө үгэс салҕанан, быйыл балтараа мөлүйүөҥҥэ чугаһыыр сибэкки куораппытын тупсарда диэн этэллэр Департамент үлэһиттэрэ.
Сарсын сибэкки бэстибээлигэр кэлиҥ, сылдьыҥ, ыалдьыттааҥ.