Бэҕэһээ Москва рейсинэн Иерусалим куоракка умайбыт сибэтиэй уоту Дьокуускайга аҕаллылар. Бу уот тыһыынчанан сылларга Пасха күнүн иннинэ Таҥара хараамыгар бэйэтэ умайан кэлэр. Христианнар маны айыы тыына, улуу дьикти күүс көстүүтэ диэн ааттыыллар.
Ангелина Васильева, “Саха сирэ” хаһыат, edersaas.ru
Бу дьиктини көрөөрү христианнар араас дойдулартан Иерусалимҥа мусталлар, түүннэри маныыллар. Чүмэчилэр туран эрэ бэйэлэрэ умайан кэлэллэр, бастакы мүнүүтэлэргэ уот киһи илиитин сиэбэт, ол иһин уотунан сирэйдэрин, илиилэрин сууналлар. Сибэтиэй уоту Москваҕа аҕалаллар, онтон салгыы епархияларынан тарҕаталлар.
IV үйэҕэ Григорий Нисский диэн киһи бу уот туһунан суруйбута баар. Өскөтүн ханнык эрэ сылга уот көстүбэтэҕинэ, Таҥара биһигиттэн киэр хайыспыт, сэрии буолар буолбут диэн куттаналлар. Ол иһин сыл аайы долгуйа, эрэнэ кэтэһэллэр.
Сибэтиэй уоту Москваттан анал дэлэгээссийэ аҕалла. Кинилэр истэригэр меценат Сергей Немировскай, артыыстар Ольга Кабо, Александр Кузнецов, Рамиль Сабитов, Олег Охотниченко, Владимир Петров бааллар. Немировскай Дьокуускайга, Өлүөхүмэҕэ уонна Уус Маайаҕа таҥара дьиэлэрин тутууга үбүн-харчытын сиэртибэлээбитэ. Оттон артыыстар епархия ыытар «Доброе кино» диэн II киинэ бэстибээлигэр кытталлар. Кинилэр бу бэстибээл чэрчитинэн, Дьокуускайга номнуо иккис сырыылара.
Уоту бүтэй лампаадаҕа уган, “Якутия” авиахампаанньа үлэһиттэрэ анал докумуоннары толорон, сөмөлүөт иһигэр куттала суох буолуу бары миэрэлэрин тутуһан, аҕаллылар. Сибэтиэй уот сыл аайы христианнары үөрдэр, итэҕэллэрин күүһүрдэр.
Ангелина Васильева, “Саха сирэ” хаһыат, edersaas.ru