Куораппыт сквердэригэр, арыый кэҥэс, киһи оҕотун кытта күүлэйдиэн сөптөөх сирдэригэр, дьон ытын күүлэйдэтэр. Оннооҕор ыттарын «туалетын» хомуйбаттар. Ол түмүгэр, араас ыарыы, инфекция тарҕанар буоллаҕа. Үтүө санаа сылын көрсө, тохсунньу 19 күнүгэр Дьокуускай дьаһалтатыгар куораты тупсарыыга сугулаан буолбут. Сугулаан түмүгүнэн, куораппытыгар ыты күүлэйдэтэргэ аналлаах былаһааккалар тутуллуохтара диэн иһитиннэрбиттэр.
Ульяна ЗАХАРОВА, «Саха сирэ» хаһыат, edersaas.ru
Бу туһунан Дьокуускай куорат ОДьКХ-тын уонна энергетикатын Департаменын салайааччы Дина Николаева edersaas.ru кэпсээтэ:
— Ыт былаһаакката наада дуу, суох дуу диэн ыйытыкка олохтоохтор наадатын бэлиэтээбиттэр. Онон түөрт былаһаакка тутуллара былааннанар. Куорат мэра Айсен Николаев сүбэһитэ Наталья Демина салалталаах “Чэлгийэр Дьокуускай” (Цветущий Якутск) диэн ааттаах анал бөлөх тэриллэн, “Экология”, “Благоустройство”, “Спец бырайыактар” диэн үс хайысхаҕа арахсан үлэтин саҕалыаҕа. Ыттарга аналлаах былаһааккалар тутууларын бу бөлөх сүрүннүөҕэ. Былаһаакка тутуутугар куорат дьаһалтата биир мөл солк. үбүлүөҕэ. Оттон тутуутун, эбии тиийбэт үбүн кыылы көмүскээччилэр бэйэлэрэ анал хамыыһыйа тэринэн булуохтаахтар. Маны сэргэ, “Собачка-копилка” диэн скульптура оҥоһуллуоҕа. Тимир ыт копилкаҕа мэрия үп көрүөхтээх. Копилкаҕа мунньуллубут харчыны инникитин ыт питомнигын тутуутугар ыытыахтара. Былаһааккаҕа анаммыт сир төһө кээмэйдээҕин Сир сыһыаннаһыытын департамена быһаарыаҕа. Былаһааккаҕа ыттарын күүлэйдэтэн баран ыт тахсан киирбитин хаһаайын бэйэтэ хомуйарын ситиһиэхтээхпит.
Бэлиэтээн эттэххэ, ыттарга бастакы былаһаакка аҕыйах сыллааҕыта 202 мкр. тутуллубута. Омук сирдэригэр, улахан куораттарга хаһаайыннаах ыт бэйдиэ сылдьан тахсан киирбэт. Ыты көччүтэр анал сирдэр баар буоланнар, куораттара ыраас. Былааҥҥа киирбит ыт былаһааккаларын туттахтарына, биһиги даҕаны куораппыт чахчы, чэлгийиэ турдаҕа. Оҕолорбут, дьон-сэргэ ыт сааҕын үктүөм диэбэккэ, холкутук хаамар, сынньанар буолуохтара.
Ульяна ЗАХАРОВА, «Саха сирэ» хаһыат, edersaas.ru
Хаартыскаҕа Киров куоракка оҥоһуллубут копилка. Кыра кэм устата 80 тыһ.солк. хомуйбут.