Дьокуускайга ыытыллар Александр Федотов кэриэһигэр боксаҕа Бүтүн Арассыыйатааҕы турнирга Василий Егоров кыттыаҕа
Бүгүҥҥүттэн Дьокуускайга бокса федерациятын бэрэсидьиэнэ, Саха Өрөспүүбүлүкэтин норуотун хаһаайыстыбатын үтүөлээх үлэһитэ, РФ үтүөлээх тутааччыта Александр Федотов кэриэһигэр боксаҕа Бүтүн Арассыыйатааҕы турнир саҕаланар.
“Дохсун” спорткомплекс рингэтигэр Бурятия, Хабаровскай, Магадан, Амур, Сахалин спортсменнарын сэргэ Саха сирин боксердара 49, 52, 56, 60, 64, 69, 75, 81, 91 уонна 91 киилэттэн үөһэ ыйааһыннарга күүстэрин холоһуохтара. “А” кылаастаах турнирга маастардар, спорт маастарыгар хандьыдааттар, бастакы разрядтаахтар эрэ кытталларынан, итиэннэ бастаабыттарга Арассыыйа спордун маастара аат иҥэриллэринэн, түөрт күн устата сытыы киирсиилэр буолаллара күүтүллэр.
Күрэхтэһиигэ Саха сирин хамаандатыттан Европа икки төгүллээх чөмпүйүөнэ, аан дойду чөмпүйэнээтин үрүҥ көмүс призера, спорт үтүөлээх маастара Василий Егоров кыттара боксаны сэҥээрээччилэри үөрдэрэ чахчы. Санатар буоллахха, Василий Егоров дьиэтигэр-уотугар тиһэҕин 2014 сыллаахха, устудьуоннар ортолоругар аан дойду чөмпүйэнээтигэр күрэхтэһэн турар.
Александр Федотов кэриэһигэр Бүтүн Арассыыйатааҕы турнир күүстээх боксердарга алтынньы ыйга Дьокуускайга ыытыллар дойду чөмпүйэнээтигэр бэлэмнэниилэрин бастакы түһүмэҕинэн буолуоҕа.
Роман Попов, “Саха сирэ” хаһыат, edersaas.ru