Соторутааҕыта Дьокуускай куорат дьаһалтатын аактабай саалатыгар ырыа суруйар ааптар, бард-ырыаһыт Владимир Егоров «Мой седой Якутск» компакт-диискэтэ Үтүө санаа сылын чэрчитинэн сүрэхтэннэ.
«Инбэлиит-устудьуоннар уонна исписэлиистэр өрөспүүбүлүкэтээҕи ассоциациялара» уопсастыбаннай тэрилтэ былырыын Дьокуускай к. баһылыга Айсен Николаев Гранын сүүйбүтэ. Онон бу диискэ уопсастыбаннай суолталаах Грант көмөтүнэн таһаарылынна.
Компакт-диискэни сүрэхтээһиҥҥэ Дьокуускай к. баһылыгын социальнай боппуруостарга солбуйааччы Евдокия Евсикова, бэйиэт биир идэлээхтэрэ, доҕотторо, аймахтара уонна оҕо доруобуйатын чэбдигирдэр лааҕырдар оҕолоро кытыннылар.
Евдокия Евсикова: «Владимир Егоров ырыалара балаҕан ыйыгар Куорат күнэ ыытыллар араас былаһааккаларыгар куруук ылланыахтарыгар эрэнэбин», – диэн туран, бард-ырыаһыт айар үлэтин сэҥээрээччилэргэ дьиҥнээх бэлэх оҥоһуллубутун астына бэлиэтээтэ. Улахан махталын бырайыак ааптара уонна көҕүлээн таһаарааччы, ХИФУ дистанционнай үөрэтиини сайыннарар Хотугулуу-Илиҥҥи научнай-инновационнай киинин дириэктэрэ Пантелеймон Егоровка биллэрдэ.
МРЗ форматынан тахсыбыт компакт-диискэҕэ ааптар 14 нууччалыы тылынан ырыата киирбит.
Владимир Егоров доҕотторо Александр Васильев, Александр Капитонов уо.д.а. ааптар ырыалара эдэр көлүөнэни төрөөбүт дойдуну, Дьокуускай куораты таптыырга, майгы-сигили сыаннастарын үрдүктүк тутарга үөрэтэллэрин тоһоҕолоон бэлиэтээтилэр.
Ырыаһыт кыра балта Любовь Прокопьевна кини убайа орто дойдуга айар аналлаах кэлбитин туһунан эттэ. Кинилэр аҕалара Прокопий Егоров Саха сиригэр биллэр суруналыыс уонна «Молодежь Якутии» хаһыат бастакы эрэдээктэрэ этэ.
Пантелеймон Егоров: «Доҕорум төрөөбүт-үөскээбит Дьокуускайын олус таптыыра. Элбэх ырыатын куоратыгар уонна бэйэтин доҕотторугар анаабыта. «Мой седой Якутск» диэн кини киэҥник биллибит ырыата кыырыктыйа быһыытыйбыт кырдьаҕас, ол эрэн, куруук эдэр Дьокуускай куорат гиимининэн буолар толору кыахтаах. Онон, бу ырыаны Дьокуускай куорат гиимининэн бигэргэтэргэ уонна сыл аайы Куорат күнүн бырааһынньыгын сиэрин-туомун бу ырыанан аһарга Дьокуускай к. Дууматын дьокутааттарыгар этии киллэрдибит», – диэн бэйэтин санаатын үллэһиннэ.
Сүрэхтэнии долгутуулаах күнүгэр В.Егоров ырыаларын элбэх ырыаһыт толордо. Нарын-намчы матыыптаах, гитара доҕуһуолунан ылланар ырыалар бу күн ааспыт кэмнэр кэрэ кэрэһиттэрэ буоллулар.
ххх
Владимир Прокопьевич Егоров Дьокуускай к. 3 №-дээх оскуолатын бүтэрбитэ.
Саха судаарыстыбаннай университетын физико-математическай факультетыгар устудьуоннуоҕуттан ыла университет уопсастыбаннай уонна наукаҕа үлэтигэр көхтөөхтүк кыттан барбыта. Ону сэргэ, ис кутуттан тахсар хомоҕой хоһоонноругар ырыа айбыта. 1970-с сылларга кини ырыаларын араас бэстибээллэргэ, кэнсиэртэргэ, походтарга, тутуу этэрээттэригэр ыччат уоһуттан түһэрбэккэ ыллыыр буолбута.
Владимир Егоров ону тэҥэ, спордунан, ол иһигэр хайыһарынан дьарыктаммыта, университекка спортивнай гимнастикаҕа чемпионнаабыта. Үөрэнэр факультетыгар вокальнай-инструментальнай ансаамбылы салайбыта, кэлин «Кыталык» самодеятельнай ырыа кулуубун тэрийбитэ. Кини уус-уран самодеятельность куораттааҕы, өрөспүүбүлүкэтээҕи уонна Арассыыйатааҕы көрүүлэрин лауреатынан буолбута элбэҕи этэр.
Университеты ситиһиилээхтик бүтэрэн баран, үс бастыҥ устудьуон иһигэр киирсэн, университекка прикладной математика уонна ааҕар-суоттуур тиэхиньикэ отделыгар үлэлии хаалбыта. Сүүрбэттэн тахса сыл РНА Саха сиринээҕи Научнай киинин үлэтигэр-хамнаһыгар бэйэтин кылаатын киллэрбитэ.
Владимир Егоров 1997 с. баара-суоҕа 43 эрэ сааһыгар уһун ыарахан ыарыыттан Орто дойду олоҕуттан туораабыта. Кэргэнэ Ольга Николаевналыын икки кыыс оҕону төрөппүттэрэ. Билигин кинилэр үс сиэннээхтэр уонна биир хос сиэннээхтэр.
Надежда ЕГОРОВА, «Саха Сирэ» хаһыат, edersaas.ru