1632 сыллаахха балаҕан ыйын 25 күнүгэр Туймаада хочотугар бастакы остуруок тутуллубута. Итинтэн ылата тапталлаах дойдубут хайдах уларыйан-тэлэрийэн, сайдан кэлбитэ устуоруйа буолан тиһиллэн иһэрэ кэрэхсэбиллээх. Онон дьон өйүгэр-сүрэҕэр иҥэр умнуллубат күн сыллата өрө көтөҕүллүүлээхтик бэлиэтэнэр. Быйыл тапталлаах Дьокуускайбыт төрөөбүт күнүн уонна Саха сирэ Арассыыйа судаарыстыбатын састаабыгар киллэриллибитин балаҕан ыйын 10 күнүгэр үөрэ-көтө бэлиэтиэхпит.
Дьокуускай куорат култуураҕа уонна духуобунай сайдыыга управлениетын начаалынньыгын солбуйааччы Лариса Андреева иһитиннэрбитинэн, бу улахан долгутуулаах тэрээһин атырдьах ыйын 31 күнүттэн балаҕан ыйын 10 күнүгэр диэри салҕанан барар. Култуурунай-сырдатар, аралдьытар тэрээһиннэр, бэстибээллэр, куонкурустар, дьаарбаҥкалар дьон-сэргэ болҕомтотун тардыахтара. Бырааһынньык куорат бары болуоссаттарыгар, култуура уонна сынньалаҥ пааркатыгар, Оҕо-аймах дыбарыаһын таһыгар, Кырдьаҕас куоракка, куорат таһынааҕы бөһүөлэктэргэ бырагыраама быһыытынан ыытыллар. Атырдьах ыйын 16 – 25 күннэригэр тапталлаах куораттарын туһугар ис сүрэхтэриттэн кыһаллар биирдиилээн дьоҥҥо, урбаанньыттарга, уопсастыбаннай тэрилтэлэргэ анаан форум тэриллэр. Манна мустубуттар куораты тупсарыыга, киэргэтиигэ, харыстабыллаах сыһыаны олохтооһуҥҥа о.д.а. тиэмэҕэ кэпсэтиэхтэрэ, сүбэлэһиэхтэрэ, ону олоххо хайдах киллэрэри былаанныахтара. Үөрүүлээх күн чэрчитинэн уран тарбахтаахтар быыстапка-дьаарбаҥкалара, ырыа-тойук, үҥкүү-битии көҕүлүттэн тутуллуо. Ретро-массыыналар көрдөрүллүөхтэрэ. Маны сэргэ, доруобуйаҕа, дьарыктаах буолууга анаммыт дьаарбаҥкалар тэриллиэхтэрэ, хаартысканан быыстапкалар о.д.а. элбэх тэрээһиннэр тиһиктээхтик ыытыллаллара күүтүллэр. Култуура уонна сынньалаҥ пааркатыгар уустар маһынан оҥоһуктарын, «Атласовтар уһаайбаларыгар» өрөспүүбүлүкэ дизайнердарын түмсүүлэрин көҕүлээһининэн, туой оҥоһуктар I бэстибээллэрэ буолаллар.
Биэс сылга биирдэ буолар карнавалга куораттааҕы уонна куорат таһынааҕы бөһүөлэктэр олохтоохторо, үлэ кэлэктииптэрэ, уопсастыбаннай хамсааһыннар, ыччаттар кытталлар. Доҕордоһуу болуоссатыгар оһуохай оройуттан тутуллуо. Киэһэ дьону-сэргэни кыраһыабайынан сөхтөрөр бырааһынньыктааҕы фейерверк күүтэр.
Хаартыска: интэриниэттэн.