Дьон баҕа өттүнэн 968 сэби-сэбиргэли туттарда

Ааптар: 
Бөлөххө киир:

Былырыын, 2016 сыл муус устар 5 күнүгэр, Владимир Путин Ыйааҕынан РФ Национальнай гвардиятын войскаларын федеральнай сулууспата диэн тэриллибитэ. Биһиги өрөспүүбүлүкэбитигэр нацгвардия управлениета баар буолбута. Бэҕэһээ, ахсынньы 28 күнүгэр, РФ Росгвардиятын федеральнай сулууспатын Саха сиринээҕи управлениетын салалтата 2017 сыллааҕы үлэтин түмүктүүр пресс-конференциятын оҥордо.

edersaas.ru


Манна РФ Росгвардиятын федеральнай сулууспатын Саха сиринээҕи управлениетын начальнига Сергей Челищев, управление начальнигын солбуйааччы — Лицензияны биэрэр, көҥүллүүр киинин начальнига Владимир Соловьев, Росгвардия Тас тэрилтэлэри харабыллыыр управлениетын начальнига Геннадий Дранович кытыннылар. Полиция полковниктара.

Росгвардия сыллааҕы үлэтигэр киһи бэлиэтиирэ туох баар эбитий? Ордук нэһилиэнньэҕэ наадалаах өттүттэн ылан эттэххэ.

Бастатан туран, саха саата суох сатаммат диэн өйдөбүлүнэн салайтардахха, Челищев бэлиэтээбитинэн, Уһук Илиҥҥи региоҥҥа биһиги өрөспүүбүлүкэбит саамай элбэх сэптээҕинэн-сэбиргэллээҕинэн инники күөҥҥэ сылдьар. Маныаха лицензияны биэрэр киин полицейскайдара өрөспүүбүлүкэ үрдүнэн гражданскай сэптээх-сэбиргэллээх 100 тыһыынчаттан тахса киһини хонтуруоллууллар. Быйыл бу дьон 99 %-на бэрэбиэркэлэммит. Ол түмүгэр, 6598 сэбиргэл, 40.157 устуука боеприпас, 986 лицензия былдьаммыт, 3540 административнай боротокуол толоруллубут.

Биир үтүө көрдөрүү быһыытынан, бу киин полицейскайдара быйыл Кэбээйигэ уонна Өлүөхүмэҕэ анаан-минээн тиийэн, дьон саатын көҥүлүн регистрациялааһыны, уһаттарыытын тэрийбиттэрэ буолар. Инньэ гынан, ыраах сытар, бөртөлүөт эрэ тиийэр бөһүөлэктэр олохтоохторун махталлара улахан. Эһиилги сылга итинник туһалаах уонна көдьүүстээх командировкалары эмиэ тэрийэр былааннаахтар.

Быйыл сэп-сэбиргэл, саа туттуулаах 42 буруй оҥоһуллубут (былырыын 38). Ол иһигэр, бултуу сылдьан, сэрэҕэ суохтан сааҕа дэҥнэнии, алҕас өлөрүү түбэлтэлэрэ эмиэ таҕыстылар.

Өссө төгүл санаттахха, хантан эрэ булуллубут, регистрацияламматах саа, ботуруон, боеприпас, ытар, дэлби тэбэр тэрил сокуоннайа суох харайыыга киирсэр буолан, Росгвардия лицензияны биэрэр киинин полицейскайдарыгар туттарыллыахтаахтар. Харчыга. Кистээн харайа, илдьэ сылдьыбыт киһи холуобунай эппиэккэ тардыллар.

Владимир Соловьев иһитиннэрбитинэн, СӨ бырабыыталыстыбата буруйу оҥорууну сэрэтэр өрөспүүбүлүкэтээҕи бырагыраама чэрчитинэн сылын аайы бу сыалга ботуччу үп-харчы көрөр буолуоҕуттан, нэһилиэнньэ регистрацияламмыт да, регистрацияламматах да сааны-саадаҕы, сэби-сэбиргэли хото туттарар буолбут. Ол курдук, бу сылга дьон баҕа өттүнэн 968 сэби-сэбиргэли, 38 тыһыынча устуука боеприпаһы туттарбыт.

Росгвардия управлениетын биир сүрүн сулууспата — харабыллааһын управлениета — Уһук Илиҥҥи региоҥҥа үчүгэй көрдөрүүлээҕинэн эмиэ инники кэккэҕэ сылдьар. Начальник Геннадий Дранович пресс-конференцияҕа иһитиннэрбитинэн, кэлиҥҥи сыллар устатыгар кинилэр харабыллыыр эбийиэктэригэр биир да уоруу тахсыбатах. Ол — 3000-тан тахса араас көрүҥнээх бас билии эбийиэктэрэ уонна 2000-тан тахса кыбартыыра. Маныаха бу харабыллааһын полицейскайдара күннэтэ (норуокка «ОВО» диэнинэн биллэр) уопсастыбаннай бэрээдэги араҥаччылааһыҥҥа, уорбаланааччылары тутууга эмиэ кыттар эбээһинэстээхтэр.

Росгвардияҕа ОМОН этэрээтэ («Отряд мобильный особого назначения») эмиэ киирэр. Бу сыл саҕаланыаҕыттан ОМОН 222 анал эпэрээссийэҕэ кыттыбыт.

Вера МАКАРОВА, «Саха сирэ» хаһыат, edersaas.ru

Хаартыскалар: РФ Росгвардиятын федеральнай сулууспатын Саха сиринээҕи управлениетын пресс-сулууспата.

+1
0
+1
0
+1
0
+1
0
+1
0
+1
0
+1
0