«Сатаа да саһыл саҕалан», «Без лоха жизнь плоха» диэн саарбах санаанан салайтаран, итэҕэйимтиэ дьону албыннаан, хармаанын хаҥаттааччы, сиэбин кэҥэттээччи бу үйэҕэ элбээн иһэр чинчилээх.
Вера МАКАРОВА, «Саха сирэ» хаһыат, edersaas.ru
Дьокуускай куорат полициятыгар биир оннук түөкүн сиэртибэтэ буолбут дьахтартан сайабылыанньа киирбит.
Бу дьахтар социальнай ситимнэргэ «улууска таһаҕас ыытыам этэ» диэн биллэрии таһаарбыт. Онуоха биир дьахтар сибээскэ тахсан, «мин оруобуна ол улууска бу барыахтаахпын, манньаҕа таһаҕаскын таарыччы илдьэн биэрэбин» диэн эрэннэрбит.
Таһаҕаһын кыайан ыыппакка сылдьыбыт дьахтар онуоха үөрэн, ол «үтүө санаалаах» дьахтарга ыытыахтаах малын-салын илдьэн биэрбит.
Ол эрээри, ыыппыт таһаҕаһа аадырыһыгар тиийбэтэх, оттон илдьиэм диэн эрэннэрбит чүөчэ төлөпүөнүн арааран, сүтэн хаалбыт. Дьахтар, дьэ, онно эрэ өйдөөбүт, түөкүн угаайытыгар киирэн биэрэн, отоойкоҕо олорбутун. 51 тыһ. солк. хоромньуламмыт.
Полиция оперативниктара бу түөкүннээһиҥҥэ уорбаланар дьахтары кимин быһааран, туттулар. Бу — Үөһээ Халыматтан төрүттээх 22 саастаах кыыс эбит.
Бу эдэр кыыс ити схеманан дьону албынныырга идэтийбит: таһаҕас ыытыан баҕалаах дьону биллэриилэринэн булан, малларын тиэрдиэх буолан харчыларын эрдэ ылан баран, сүтэн хаалар эбит.
Бу чахчынан «Түөкүннээһин» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Болҕомтолоох уонна сэрэхтээх буолуҥ!
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн ылылынна.