Москваҕа, «Бэс-Чагда» санаторийга бу күннэргэ Саха сирин Дьоруой-ийэлэрэ сынньана сылдьаллар.
edersaas.ru
Улуу поэт Александр Пушкин төрөөбүт күнүн көрсө кинилэр Москва анныгар, «Захарово» уһаайба-заповедникка үгэс буолбут Пушкин бырааһынньыгар кытыннылар.
Биллэрин курдук, бу күһүн сэтинньигэ СӨ Ил Дархана Егор Борисов 14 ийэҕэ «Дьоруой-Ийэ» диэн бастакы бэлиэлэри туттарбыта. Кинилэртэн 7 Дьоруой-Ийэ араас улуустартан кэлэн, босхо путевканан «Бэс Чагда» санаторийга сынньана, эмтэнэ, доруобуйаларын чэбдигирдэ сылдьаллар. Дьоруой-ийэлэр бөлөхтөрүн 11 оҕолоох Ольга Аргунова салайар. Бу омугунан нуучча кыыһа Бурятияттан 19 сыл анараа өттүгэр кийиит буолан кэлэн, Саха сиригэр Уус Алдан улууһугар олохсуйбута. Ольга бэрт ыраастык сахалыы саҥарар. Аргуновтар 6 уол, 5 кыыс оҕолоохтор.
Вера Варламова 10 оҕолоох, сиэннэрдээх, атыылааччы идэлээх, кэргэнэ суоппар.
Ефросинья Винокурова 43 саастаах, кини 10 оҕолоох, улахан кыыһа 23 саастаах.
Амма Эмиһин олохтооҕо Туйаара Устинова 10 оҕо ийэтэ, 5 сиэннээх. Кини уола Герман Устинов — аатырбыт тустуук, спорт маастара, кийиитэ Кристина Устинова — эмиэ киэн туттар спортсменкабыт, ох саанан ытааччы. Туйаара ийэтэ
Татьяна Новикова сэбиэскэй кэмтэн Дьоруой-Ийэ, 11 оҕолоох, 43 сиэннээх, элбэх хос сиэннээх, «Победа» сопхуоска 40-тан тахса сыл ыанньыксыттаабыта. Туйаара эбэтэ Е.П. Новикова эмиэ Дьоруой-Ийэ, онон кинилэр уопсайа 3 көлүөнэ Дьоруой-Ийэ буолаллар.
Нам улууһуттан Екатерина Лукинова үс бэйэтин оҕотун сэргэ 4 оҕону иитэр, 42 сыл ыстаастаах педагог, кыраайы үөрэтээччи, кинигэлэр ааптардара, мелодист, «Высшая Благодарность матери» бэлиэ хаһаайката.
Оттон Мария Шестакова 11 оҕолоох, 7 уола Арассыыйа аармыйатыгар сулууспалаабыттар. Кини Кэбээйи Лүксүгүнүгэр саһыл ферматыгар үлэлээбитэ. Мария Иннокентьевна ийэтэ К.К.Колодезникова эмиэ Дьоруой Ийэ.
Ити курдук, Дьоруой-ийэлэр бука барыларын тустарынан үгүс элбэх интэриэһинэйи кэпсиэххэ сөп.
Ийэлэр Пушкин бырааһынньыгар сылдьан, астынан кэллилэр. Бу паарка аллеяларынан улуу поэт оҕо эрдэҕинэ элбэхтик сүүрбүтэ-көппүтэ, бу көлүччэ кытылыгар олорон ньээнньэтэ Арина Родионовна остуоруйаларын, кэпсээннэрин элбэхтик истибитэ…
Пушкин бырааһынньыгар Улуу поэт хоһооно ааҕылынна, элбэх ырыа ылланна, духовой оркестр оонньоото, норуот маастардарын быыстапка-дьаарбаҥката тэрилиннэ. Биһиги биир дойдулаахтарбыт, санаторий сынньанааччылара олус көхтөөхтөр. Холобур, эмиэ элбэх оҕону атаҕар туруорбут Елизавета Иннокентьевна Захарова сахалыы «Аҕам алааһа» ырыаны толорон, Пушкин бэстибээлин дипломана буолла.
Бүгүн Москваҕа СӨ Бастайааннай Бэрэстэбиитэлистибэтигэр Дьоруой-ийэлэри кытта истиҥ көрсүһүү буолуоҕа.
Татьяна Маркова,
Москва, » Бэс Чагда», edersaas.ru