Дьоруой ийэлэр наҕараадаларын тутуохтара

Бөлөххө киир:

Сарсын, сэтинньи 24 күнүгэр, Арассыыйаҕа Ийэ күнүгэр аналлаах үөрүүлээх киэһэ Өксөкүлээх Өлөксөй аатынан Норуоттар доҕордоһууларын дьиэтигэр буолуоҕа.

edersaas.ru


Бу күн СӨ Ил Дархана Егор Борисов Ыйааҕынан «Дьоруой Ийэ» диэн саҥа бэлиэни 14 ийэ үөрүүлээх быһыыга-майгыга тутуо.

Кинилэртэн сорохторун билиһиннэрэбит.

36 саастаах Ольга Аргунова дьиэ кэргэнинээн 11 оҕолоохтор (Уус Алдан улууһун Тиит Арыы с.).

Ольга Александровна Бурятия Өрөспүүбүлүкэтин Кяхта к. төрөөбүтэ. Саха уола Ньургун Петрович Аргуновка кэргэн тахсан, Тиит Арыы бөһүөлэгэр олохсуйан олороллор.

Элбэх оҕолоох ийэ көхтөөх уопсастыбанньык, нэһилиэгэр уонна улууһугар дьиэ кэргэҥҥэ ыытыллар ааксыйалары көтүппэккэ кыттар.

Ольга Александровна, биллэн турар, улахан болҕомтотун оҕону иитиигэ уурар. Дьиэ кэргэнинээн тэриммит улахан хаһаайыстыбаларыгар кууруссалары, сибиинньэлэри туталлар. Кырачааннар төрөппүттэрин кытары сылдьан, дьиэ ис-тас үлэтигэр эрдэттэн сысталлар. Оҕуруоттарын, хортуоскаларын бүөбэйдэһэллэр. Ийэлэрэ оҕолоруттан, хаһаайыстыбаларыттан быыс буллаҕына, баайарын, иистэнэрин, дьиэ ис бараанын сырдык тыынныыр киэргэллэри оҥорорун сөбүлүүр.

Ольга Александровна оҕолору иитиигэ өҥөлөрүн иһин 2015 с. «Ийэҕэ албан аат» уордьанынан наҕараадаламмыта.

х х х

42 саастаах Акулина Иннокентьевна Львова – Сунтаар улууһун Сунтаар сэлиэнньэтин олохтооҕо. Львовтар 7 уол уонна 5 кыыс оҕолоохтор.

Улахан оҕолоро Алексей 22 саастаах. Кыргыттартан улаханнара Алена ХИФУ автодорожнай факультетын 2-с кууруһун устудьуоҥката. Иккис кыыс Айта Сунтаарга политехническай лицейгэ үөрэнэр. Алина быйыл Дьокуускайдааҕы педагогическай колледжка киирэр баҕалаах. Юлия уонна Тамерлан – Сунтаар с. гуманитарнай гимназиятын үөрэнээччилэрэ. Рустам, Маша, Артем, Артын алын кылаастарга үөрэнэллэр. Икки кырачаан:  Данил уонна Ярослав ийэлэрин кытары дьиэ дьоно.

Акулина Иннокентьевна 2007 сылтан «Саханефтегазсбыт» Сунтаардааҕы салаатыгар үлэлиир, АЗС-ка 4-с разрядтаах оператор.

Львовтары улуустарын дьоно улаханнык сөбүлүүллэр, убаастыыллар. Бу дьиэ кэргэн чөл олоҕу тутуһар, сырдатар. Күн күбэй ийэ 2011 с. Саха сирин үрдүкү наҕараадатынан бэлиэтэммитэ. «Саханефтегзасбыт» хампаанньа Махтал суругунан хаста да наҕараадаламмыта.

Ити курдук, Дьоруой Ийэлэрбит оҕону иитиигэ кыһамньыларын сэргэ, нэһилиэктэрин, улуустарын уопсастыбаннай олоҕуттан туора турбаттар. Нэһилиэктэриттэн, улуустарыттан саҕалаан өрөспүүбүлүкэҕэ тиийэ үтүө холобуру көрдөрө сылдьар ийэлэрбитин Арассыыйа ийэлэрин күнүнэн эҕэрдэлиибит!

РФ бэрэсидьиэнэ Владимир Путин социальнай бэлиитикэҕэ улахан болҕомтотун уурар.

Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0