Дьоруой Максим

Ааптар: 
Бөлөххө киир:

Ааспыт 2015 чыл сайыныгар от ыйын 16 күнүгэр Өлүөнэ өрүс боротуокатыгар Петуховкаҕа сөтүөлүү сылдьан дохсун сүүрүккэ оҕустаран тимирэн эрэр оҕолору быыһаары ХИФУ юридическай факультетын выпускнига Алексей Никифоров ууга былдьаммыта.

Оттон от ыйын 25 күнүгэр Мэҥэ Хаҥалас Ороссолуодатыгар ХИФУ автодорожнай факультетын устудьуона Трифон Антонов доҕотторо сөтүөлүү сылдьан күүстээх сүүрүккэ оҕустаран үөс диэки баран эрдэхтэринэ быыһаан баран сэниэтэ эстэн, кыайан кытыы сири булбакка суорума суолламмыта.

“Биһиги кэммит дьоруойдара” федеральнай бырайыак чэрчитинэн ХИФУ Информатика уонна математика институтун магистрана Максим Тимофеев олоххо, үөрэххэ, сырдыкка тардыһыытын, хорсун быһыытын иһин Алексей Никифоров уонна Трифон Антонов ааттарынан олохтоммут бириэмийэ бастакы хаһаайынынан буолбута. “Кэм дьоруойа” үрдүк ааты сүкпүт Максимы кытта көрсөн кэпсэттибит.
— Дорообо, Максим! Кимтэн кииннээх, хантан хааннаах уол оҕото буолаҕын?
— Мин 1993 сыллаахха тохсунньу 9 күнүгэр Сунтаарга Екатерина Михайловна уонна Нестор Семенович Тимофеевтар дьиэ кэргэттэригэр 7-с оҕонон күн сирин көрбүтүм. 1997 сыллаахха биһиги Горнай Бэрдьигэстээҕэр көһөн кэлбиппит. Манна Бэрдьигэстээх 2-с №-дээх оскуолатын кыһыл көмүс мэтээлинэн бүтэрбитим. Ийэм Екатерина Михайловна көрөн-истэн, кыра оҕолуу бүөбэйдээн Фридрейх спинальнай атаксията диагнозтаах 1 группалаах инбэлиит киһи, билигин кэккэ ситиһиилээхпин. Ити көрөрүҥ курдук, грамоталар, сертификаттар, махтал суруктар бэрт элбэхтэр. (Ол курдук, 2007 с. “Зеленая планета глазами детей” бүтүн Россиятааҕы куонкурус лауреата буолбут, РФ Тыатын хаһаайыстыбатын министиэристибэтин дипломунан наҕараадаламмыт, 2008 с. “Саха Азия оҕолоро” фонда “Бриллиант республики” номинациятын кыайыылааҕа, 2011 с. Бэрдьигэстээх 2-с №-дээх орто оскуолатын кыһыл көмүс мэтээлинэн бүтэрэр, 2015 с. ХИФУ ИМИ бакалавриатын ситиһиилээхтик бүтэрэр, дипломун “биэс” сыанаҕа көмүскүүр, онтон Новосибирск куоракка “Майкрософт” приложениеларын оҥорор хампаанньаҕа үлэҕэ ыҥыраллар онуоха Максим аккаастанар уонна ХИФУ-га салгыы магистратураҕа туттарсар).
— Дьэ, Максим устудьуон сылларгыттан сырдата түс эрэ.
— Мин 2011 сыллаахха оскуолабын бүтэрээт ХИФУ Информатика математика институтугар “Фундаментальнай информатика” салаатыгар туттарсан киирбитим. Кэккэ ыарахаттар бааллара, барытын кыайбытым, тулуйбутум. Үөрэнэр баҕам батарбакка, магистратураҕа киирбитим, эһиил бүтэриэхтээхпин. Бастаан утаа үөрэнэр сирбэр – КФЕН-ҥэ пандус суоҕа улахан эрэйдэри үөскэппитэ. Биир сылы быһа ийэбиниин КФЕН үрдүк кирилиэстэрин кытта (таһырдьааҥҥы 19 уонна иһирдьээҥҥи 5 үктэл) киирсэн тахсар этибит. Көрөрүҥ курдук, бэйэм сатаан сылдьыбаппын, көнөтүк да олорорум сүрдээх ыарахан. Аҕам бастакы сылбар Горнайга хаалбыта, инньэ гынан ийэбинээн хара көлөһүммүтүн тохпуппут. Оттон, дьэ, университет салалтатыгар, куорат дьаһалтатыгар туруорсаммыт 2012 сыллаахха үөрэнэр сирбэр пандус оҥорбуттара. Уопсайбытыгар, хата, пандус баар буолан абыраабыта. Манныгы бэлиэтээн ааһыахпын баҕарабын — куорат устун кэлээскэнэн сылдьан кэрийэр киһиэхэ олус ыарахан, пандустар суохтар, аны баар буоллахтарына, аһары туруорулар, тахсыылара үрдүктэр, суол бордюрдара үрдүктэр, тротуарга тахсыы эмиэ кирилиэс курдук, оптуобуска кэлээскэлээх киһиэхэ аналлаах туох да суох, такси да массыыналарыгар эмиэ биир оннук. Инньэ гынан биһигинньик дьон Дьокуускайга биир дьиэҕэ хааллан олорорбутугар тиийэбит…
— Бииргэ үөрэнэр оҕолор төһө элбэххитий?
— Бөлөхпүтүгэр 15 этибит. Уолаттар-кыргыттар бары сүрдээх доҕордуубут. Оҕолор бастаан кыбыстан дуу, куттанан дуу чугаһаабат этилэр. Кэлин көрө үөрэнэн, ыаллаһан кыһаммат буолбуттара. Үөрэ-көтө кэпсэтэллэр. Көмөлөһөр доҕоттор бааллар.
— Үөрэҕи таһынан өссө тугунан дьарыктанаргын сөбүлүүгүнүй?
— Мин театрдарга, киинэҕэ сылдьааччыбын. “Отчизна” патриотическай кулуупка уонна “NEFU International” устудьуоннар кулууптарыгар дьарыктанабын. КФЕН дискотекатын көтүппэппин, кэнсиэрдэргэ эмиэ сылдьааччыбын. Миигин төрөппүттэрим арыаллыы сылдьаллар, соҕотоҕун сатаан сылдьыбаппын.
— Максим, оттон үөрэххин бүтэрдэххинэ туох исписэлиис буолаҕын?
— Үөрэхпин бүтэрдэхпинэ инженер-программист идэлээх киһи буолабын. Ол аата араас компьютернай, мобильнай программалары, приложениелары, оонньуулары «суруйуохпун», оҥоруохпун сөп.
— Онтон билигин туохха эмэ холонон көрдүҥ дуо?
— Боруобалаан бөҕө. Бэйэм-бэйэбэр ону-маны гынабын.
— Дьоруой Максим, инникитин туох былааннааххын?
— Бастатан туран, үөрэхпин бүтэрэн үлэһит буолуохпун баҕарабын, чугас дьонум этэҥҥэ сылдьалларыгар баҕарыам этэ. Уонна, саамай кылаабынайа, дьоҥҥо чахчы туһалаах программа дуу, приложение дуу толкуйдаан оҥоруохпун баҕарабын. Мин саамай ыра санаам – ол! Оттон бэйэм курдук кэлээскэҕэ кэлгиллэн олорор уонна да атын инбэлиит дьоҥҥо этиэм этэ – бэйэҕититтэн кыбыстымаҥ, дьиэҕитигэр бүгэн олорумаҥ, уопсастыбаҕа сылдьыҥ, кытаанах санаалаах, сыалгытын-соруккутун хайаан да ситиһэр буолуҥ!
Дмитрий ВАСИЛЬЕВ, edersaas.ru

+1
0
+1
0
+1
0
+1
0
+1
0
+1
0
+1
0