Арассыыйатааҕы Ийэ күнүгэр Өксөкүлээх аатынан Култуура дьиэтигэр өрөспүүбүлүкэ аҕа баһылыга “Дьоруой Ийэ” бэлиэлэри, “Ийэ Албан аата” мэтээллэри туттартаата. edersaas.ru
Ил Дархан бу күн мэлдьи бэйэтин ийэтин саныырын туһунан иһитиннэрдэ.
“Мин ийэ тапталын билбит дьоллоох киһибин. Соҕотоҕун аҕыс оҕону атахтарыгар туруорбут хоһуун дьахтар этэ. Мин элбэх оҕолору төрөппүт, ииппит ийэлэринэн киэн туттабын, үтүө майгыгытыгар, модун санааҕытыгар сүгүрүйэбин. Ханнык баҕарар уопсастыбаҕа Ийэ – сүрүн киһи, тоҕо диэтэххэ, кини бүтүн киһини иитэн, үөрэтэн таһаарар. Эһиги баар буолан, сайдабыт, ситиһиилэргэ хардыылыыбыт”, — диэтэ кини.
Өрөспүүбүлүкэҕэ ийэлэри судаарыстыба таһымыгар өйүүллэр. Федеральнай Ийэ хапытаалын таһынан, өрөспүүбүлүкэтээҕи хапытаалынан 22 тыһыынча дьиэ кэргэн туһанна. Элбэх оҕолоохторго сир учаастага, массыына бэриллэр, олорор усулуобуйаларын тупсаралларыгар субсидия көрүллэр.
Дьоруой Ийэ бэлиэни биэрэр туһунан ыйааҕы Ил Дархан быйыл саас таһаарбыта. Бэлиэни сэргэ биирдии мөлүйүөн туттарыллар.
“СӨ Дьоруой Ийэтэ” бэлиэни 14 оҕолоох Саргылаана Петрова (Сунтаар, Аллыҥа), 12-лии оҕолоох Акулина Львова (Сунтаар) уонна Лидия Спиридонова (Маар, Ньурба), 11-дии оҕолоох Ольга Аргунова (Тиит Арыы, Уус Алдан), Галина Гладких (Мохсоҕоллоох, Хаҥалас), Галина Неустроева (Бэдьимэ, Мэҥэ Хаҥалас), Мария Шестакова (Лүксүгүн, Кэбээйи), 10-нуу оҕолоох Галина Алексеева уонна Ньургуйаана Фёдорова (Ытык Күөл, Таатта), Ефросиния Винокурова (Хара Алдан Таатта), Вера Варламова (Бороҕон, Уус Алдан, Любовь Ильина (Мындаҕаайы, Чурапчы), Евдокия Стручкова (Нам, Булуҥ), Туйаара Устинова (Эмис, Амма) туттулар.
Ону тэҥэ аҕыстыы, тоҕустуу оҕолоох ийэлэргэ “Ийэ Албан аата” мэтээл туттарылынна. Мэтээли отучча ийэ ылла. Көрүҥнэриттэн көрдөххө, үксүлэрэ 30-рын, 40-рын эрэ саҥа ааспыт эдэр, кыраһыабай дьахталлар, онон сотору кэминэн Дьоруой Ийэлэр кэккэлэрэ өссө хаҥыах чинчилээх.
Наҕараадаламмыт ийэлэр ааттарыттан Акулина Львова тыл эттэ.
“Дьиэ кэргэттэри, ийэлэри, оҕолору көмүскүүр бэлиитикэ баар буолан, биһиги көмүс чыычаахтарбыт инники олохторугар эрэллээхпит. Биһиги судаарыстыба өйөбүлүн билбит дьоммут. 2012 сыллаахха грант ылбыппыт уонна микроавтобус биэрбиттэрэ, быйыл сайын кыбартыыра атыылаһарга субсидия ылбыппыт. Ийэ өрөбүлэ суох, түбүктээх үлэтэ сыаналанан, судаарыстыба таһымыгар наҕараадаланан, Ил Дархан илиититтэн мэтээл ылбыт күнүм – олоҕум саамай умнуллубат, дьоллоох түгэнэ. Ийэ буолар – муҥура суох дьол уонна ытык иэс. Өрөспүүбүлүкэ ийэлэрин куттаммакка, элбэх оҕолонон, уон төгүл дьолгутун элбэтэргитигэр ыҥырабын”, — диэн махталын биллэрдэ.
Ангелина Васильева, “Саха сирэ” хаһыат, edersaas.ru
Мария Васильева түһэриилэрэ.