Аҕа дойду Дьоруойдарын күнүнэн Хотугулуу-Илиҥҥи Федеральнай университекка төрдүс төгүлүн, хорсун быһыыны оҥорбут устудьуоннарга анал истипиэндьийэ уонна түөскэ кэтэр бэлиэ туттарыллар.
Быйыл бу истипиэндьийэ уонна түөскэ кэтэр бэлиэ университет геологоразведочнай факультетын устудьуона Александр Неустроевка туттарылынна. Кини Алдаҥҥа практикатын кэмигэр эһэ саба түһүүтүттэн уолуйан хаалбакка, олоххо тардыһыы күүһүнэн, тыыннаах хаалар туһугар түргэн-тарҕан толкуйунан, сымса-түргэн хамсаныытынан быыһаммыта. Устудьуоҥҥа түөскэ кэтэр анал бэлиэ уонна 100 тыһыынча харчы туттарылынна.
Санатан эттэххэ, олохторун толук ууралларын кэрэйбэккэ дьону быыһаабыт Алексей Никифоров уонна Трифон Антонов ааттарынан анал бириэмийэ 2015 сыллаахтан туттарыллар. Алексей ууттан 10 саастаах оҕону быыһаабыта, Трифон — икки табаарыһын.
Афанасий Саввинов бэрэссэдээтэллээх ( ХИФУ профкома) хамыыһыйа сыл ахсын бу түөскэ кэтиллэр бэлиэни уонна истипиэндьийэни кимиэхэ туттарарын болҕомтолоохтук көрөр диэн суруйар СИА Вероника Аммосова.
—Эһэни көрүстэххинэ, куотан хаалыа суохтааххын. Миэстэҕэр туруохтааххын эбэтэр улахан тыаһы-ууһу таһаарыахтааххын диэн ТБ этэллэр. Саалаах буоллаххына, салгыҥҥа ытыахха сөп. Эһэ миигиттэн түөрт эрэ миэтэрэ тэйиччи баара. Мин илиибин өрө уунан баран хаһыытаабытым. Онтум саба түспүтэ. Бу үлүгэрдээххэ хайдах да утарылаһар кыаҕым суоҕа. Онон өлбүтэ буолан, барарын күүппүтүм эрээри, эргиллэн кэлбитэ. Онно кумааҕы умата охсон быраҕаммын быыһаммытым, — диэн кэпсээбит Александр. Кинини бииргэ үөрэнэр оҕолоро көрдөөн буланнар бастакы көмөнү оҥорбуттарын эппит.
Анал истипиэндьийэни уонна түөскэ кэтэр бэлиэни ХИФУ ректорын э.т. Евгения Михайлова туттарбыт. «Биһиэхэ үөрэммит Алексейдаах Трифон үөрэн мичилийэ олорон түспүт хаартыскаларын көрдөххө, киһи хайдах да хараҕын уута тахсыбакка буолбат. Кинилэр биһиги кэккэбитигэр суохтара олус хомолтолоох. Ол гынан баран, кинилэр биһиги университеппытын кытта өрүү бааллар, ааттара университет историятыгар ааттанар. Бу бүгүҥҥү күн — кинилэр хорсун быһыыларыгар сүгүрүйүүбүтүнэн буолар«, — диэбит.
Маны сэргэ, кини кэлэр сылтан үс устудьуоҥҥа маннык анал истипиэндьийэ уонна түөскэ кэтиллэр бэлиэ туттарыллар буолуоҕун эппит.
Вероника Аммосова (СИА) хаартыскаларга түһэриитэ
