close
Дуоҕа Боотур оонньууларыгар Алексей Иванов кыайда...
Дьулуур - Олох-дьаһах

Дуоҕа Боотур оонньууларыгар Алексей Иванов кыайда

От ыйын 3-4 күннэригэр Бүлүү улууһун Тааһаҕарыгар «Дуоҕа Боотур оонньуулара» — саха многоборьетыгар күрэхтэһии буолла. Төрдүс төгүлүн ыытыллар күрэхтэһиигэ Кэбээйиттэн, Бүлүүттэн уонна Үөһээ Бүлүү Кырыкыйыттан 14 боотур кытынна.

Сэттэ көрүҥҥэ тыҥааһыннаах киирсиилэр буоллулар. “Дуоҕа Боотур оонньууларын” мээнэҕэ “Бүлүү бөлөх Дыгын оонньуулара” диэн ааттаабаттар. Киирсээччилэр ортолоругар былырыыҥҥы “Дуоҕа Боотур” муҥутуур кыайыылааҕа, “Дыгын оонньууларын” хас да төгүллээх кыттыылааҕа Николай Иванов, быйылгы “Дыгын оонньууларын” кыттыылаахтара Иннокентий Колесов уонна Алексей Иванов бааллара киирсиини өссө сытыырхатта.

Тыҥааһыннаах киирсии кэнниттэн, үс төгүл үскэ — төрдүс, мас тардыһыытыгар — иккис, тутум эргииргэ — бастакы, 400 миэтэрэҕэ сүүрүүгэ — бастакы, оҕунан ытыыга — бастакы, хапсаҕайга — төрдүс уонна тааһы көтөҕүүгэ — төрдүс буолан, 17 очукуолаах Үөһээ Бүлүү Кырыкыйыттан төрүттээх Алексей Иванов муҥутуур кыайыылааҕынан таҕыста. Алексейы 150 000 солк. наҕараадалаатылар уонна батыйа туттардылар. Кини кэнниттэн, Бүлүү Илбэҥэтиттэн сылдьар Николай Текеянов иккис буолан, убаһа сэртипикээтин тутта. Үһүс буолбут Кэбээйи Лүүчүнүн боотура Николай Иванов 30 000 солк. хаһаайынынан буолла.

Күрэхтэһиини түөрт сыл устата “Дуоҕа Боотур” уопсастыбаннай тэрилтэ тэрийэн ыытар. Сүрүн судьуйанан Алексей Мостахов, кэмэнтээтэринэн Александр Васильев-Көрдүгэн үлэлээбиттэрэ күрэхтэһиини өссө киэргэттэ.   

Николай Павлов, “Дуоҕа Боотур” уопсастыбаннай түмсүү салайааччыта:

— Күрэхтэһиибит төрдүс төгүлүн үрдүк таһымнаахтык ыытылынна. Спортсменнар олус бэлэмнээх кэлбиттэр. Кинилэр киирсиилэрин көрөн, дьон-сэргэ астынна. “Дуоҕа Боотур” уопсастыбаннай түмсүү тэрээһинэ улахан таһымнаах күрэхтэһиигэ кубулуйан эрэриттэн биһиги үөрэбит. Урбаанньыт Дьяконов Аркадий Петровичка , Андросов Егор Афанасьевичка («Охотник на Ярославского»), Ил Түмэн дьокутаатыгар Окоемов Юрий Константиновичка, «Киэргэ» көмүс атылыыр тэрилтэ генеральнай дириэктэригэр Павлов Александр Кирилловичка, «Көмүөл» кинигэ кыһатын дириэктэригэр Борис Павловка, Урбаанньыт Афанасий Варламовка , Тимир ууһугар Владимир Яковлевка уонна да үгүс биир дойдулаахтарбытыгар бириис туруоруутугар көмө буолбуттарын иһин улаханнык махтанабын. Күрэхтэһиини тэрийэргэ көмөлөспүт дьоҥҥо, спонсордарбытыгар, нэһилиэктэр баһылыктарыгар барҕа махталбын тиэрдэбин. Эһиил күрэхтэһиибит Кэбээйи Мукучутугар ыытыллыаҕа.

Николай Попов, «Саха сирэ» хаһыат, edersaas.ru

#бүгүн: 1
4
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

11 − 10 =