«Атас туһугар атах тостор» диэн өс хоһоонун арыый уларытан эттэххэ, дьүөгэтин туһугар өр толкуйдуу барбакка, көмөлөһө-быыһыы охсор баҕалаах кэрэ аҥар баар эбит. Ол эрэн, үчүгэйдик быһаарса барбакка тиэтэйбитэ бэйэтигэр охсуулаах буолбут.
Ол курдук, Дьокуускай куорат полициятыгар 26 саастаах кыыс кэлэн, албыҥҥа киирэн биэрэн, харчытыттан маппытын, ол киһини булан, миэрэҕэ тардалларыгар сайабылыанньа суруйбут.
Кыыс кэпсээбитинэн, киниэхэ биир социальнай ситиминэн дьүөгэтиттэн иһитиннэрии кэлбит, 8 тыһ. солк. иэстииригэр көрдөспүт. Бэриниилээх дьүөгэ тута харчыны ханна ыытарын туһунан ыйыппыт. Онуоха «дьүөгэтэ» баан каартатын нүөмэрин суруйбутугар, көрдөөбүт сууматын ыыппыт.
Сотору буолан баран, аны 5 тыһ. солк., онтон 7 тыһ. солк. харчыны көрдөөбүтүн, тута ыытан испит.
Ол курдук көрдөөбүт сууматын барытын ыытан баран биирдэ, дьэ, дьүөгэтигэр бассаабынан суруйбут, харчыны туттуҥ дуо диэн. Онуоха дьиҥнээх дьүөгэтэ социальнай ситимҥэ кини аккаунун алдьаппыттарын, харчыны кини көрдөөбөтөҕүн эппит. Дьэ, «бабат» диэт, полицияҕа сүүрбүт.
Бу чахчынан бэрэбиэркэ барарын СӨ ИДьМ-тын пресс-сулууспата иһитиннэрдэ.
Социальнай ситимнэринэн билэр киһигит аккаунуттан харчы көрдөөтөхтөрүнэ, тута ыыта охсумаҥ, бастаан тугун-ханныгын чуолкайдаан билиҥ, быһаарыҥ! Интэриниэтинэн отоойкоҕо олордор албын-түөкэй киһи элбэх, болҕомтолоох буолуҥ!
Вера Макарова, «Саха сирэ» хаһыат, edersaas.ru
Хаартыска: интэриниэттэн.