Ыам ыйын 27 күнүгэр «Эһээ Дьыл сайыны көрсөр» 15 сыллаах үбүлүөйдээх тэрээһин Владимировка бөһүөлэк аттыгар күөх хонууга буолан ааста. Саха итэҕэлинэн, Саҥа дьыл сайын саҕаланар. Самаан сайын кэлбитин бэлиэтигэр олус үчүгэй күн-дьыл туран биэрдэ. Тэрээһин Саха итэҕэлин чинчийэр Гавриил Угаров — Эһээ Дьылы көрсүүттэн саҕаланна. Уот иччитин алаадьылаах кымыһынан күндүлээтилэр. Күн сардаҥатынан, алгыс тылынан уонна чаҕылҕан охсубут маһын буруотунан ыраастанан, мустубут ыалдьыттар сүрдэрэ көтөҕүлүннэ. Сиэр-туом быһыытынан, саҥа сылга үктэммиттэрин бэлиэтиир кутаа тула сыл бастакы оһуохайын тэрийдилэр.
Бу күн экстремал-сүүрүктэри көрүстүлэр. Кинилэр Дьокуускай куораттан икки көстөөх сиргэ бэрт чэпчэкитик сүүрэн, саҥа сылы көрсө түһүлгэҕэ тиийэн кэллилэр. Сүүрүктэри Саха сирин физическэй култууратын уонна спордун үтүөлээх үлэһитэ, Үөһээ Бүлүүгэ ыытыллар Манчаары оонньууларын уотун эстафетатын салайааччы Дмитрий Горохов. Саҥа сыл саҕаламмытынан, спортсменнар эҕэрдэ тылларын эттилэр, Эһээ Дьыл махтал суругун туттулар.
Норуот ууһа Николай Аржаков-Боло Уус оҥорбут ох саатын тэбэр күүһүн көрдөрдө. Халлааҥҥа иһиирбитинэн тахсар, охчут кыҥаабытынан түһэр оноҕостоох ох саа дьону-сэргэни сөхтөрдө. Былыр- былыргыттан үгэскэ кубулуйбут хары баттаһыытыгар күрэхтэһиилэри аан дойду чөмпүйүөнэ Петр Наумов иилээн-саҕалаан ыытта.
Ону тэҥэ, тэрийээччилэр ырыа-тойук аргыстаах кэнсиэри тэрийдилэр, саха таҥаһын көрдөрөн парадтаатылар. Сайыны көрсөөһүн тэрийээччилэрэ: Эһээ Дьыл дьиэтэ, Дьокуускай Автодорожнай, Октябрьскай уокуруктар, «СаХабар» ХЭТ уонна Өктөм паарка.
Галина Сидорова, Автодорожнай уокурук бэтэрээннэрин сэбиэтин бэрэссэдээтэлэ:
— Сыл аайы Самаан сайыны көрсөр тэрээһиммит үрдүк таһымнаахтык ыытыллар. Быйыл уон бэһис төгүлүн буолар. Автодорожнай уокурук бэтэрээннэрэ Эһээ Дьылы кытары ыкса үлэлэһэбит. Ол курдук, Эргэ Саҥа дьылы уонна сайыны көрсүүнү бииргэ тэрийэбит. Эдэр көлүөнэҕэ өбүгэлэрбит үгэстэрин, Гавриил Угаров чинчийбит үөрэҕинэн сыһыарар соруктаахпыт.
Николай Попов, «Саха сирэ» хаһыат, edersaas.ru