Амма улууһун Эмис нэһилиэгин эбээлэрэ «Көлүкэчээн» ырыа ансаамбылын тэрийэн үлэлэппиттэрэ 14 сыл буолла. Бу кэм устата ансаамбыл кыттыылаахтара саха ырыатын-тойугун нөҥүө нэһилиэнньэни сомоҕолуур, түмэр суолталаах үлэни ыытан кэллилэр.
Бэйэлэрин кэмнэригэр тыа хаһаайыстыбатын, култуура, үөрэх салааларыгар үтүө суобастаахтык үлэлээн, нэһилиэк сайдыытыгар сүҥкэн кылааттарын уурсубут дьон сааһыран да баран, олох эргийэр кииниттэн туора турбаттар. Бары тутуспутунан нэһилиэккэ, улууска, өрөспүүбүлүкэҕэ ыытыллар тэрээһиннэргэ кытталлар, төрөөбүт түөлбэлэрин ааттаталлар, үүнэр ыччакка уопсастыбаннай өй-санаа диэн тугун бэйэлэринэн холобур буолан көрдөрөллөр.
Ансаамбыл бастакы салайааччыта Татьяна Иннокентьевна Захарова эдэр эрдэҕиттэн олоххо көхтөөх киһи. Кини: «Тэриниэххэйиҥ, түмсүөххэйиҥ», — диэн эппитин сыыска-буорга түһэрбэккэ, ырыа тула түмсэн, 14-с сылларын ситиһиилээхтик үлэлии сылдьаллар.
Ансаамбыл билиҥҥи салайааччыта, Эмис орто оскуолатыгар өр сылларга алын кылаас учууталынан үлэлээбит, педагогическай үлэ бэтэрээнэ Ольга Саввична Михайлова буолар. Татьяна Иннокентьевнаттан туппут үлэтин өссө сайыннаран, бөҕөргөтөн «Көлүкэчээн» үлэтин хайысхатын кэҥэтэн, үрдүк таһымҥа таһаарда. Бары тутуспутунан Амманы, Дьокуускайы ааһан, хотугу эргимтэ кэтэҕэр сытар Эдьигээнинэн эргийэн, Арассыыйа киин куораттарынан Москванан, Санкт-Петербурунан, Сочинан, Калининградынан сылдьан, саха ырыатын-тойугун билиһиннэрэллэр. Кэнники сылларга Дьокуускай куоракка үлэлиир Үһүс көлүөнэ оскуолатын кытта ыкса сибээһи туталлар.
Бу күннэргэ «көлүкэчээннэр» 14 буолан Эмис нэһилиэгиттэн анаан-минээн айаннаан кэлэн, Дьокуускай куоракка икки улахан тэрээһиҥҥэ кытыннылар. Ол курдук, бу күн кинилэр «Кэскил» оҕо бэчээтин кыһата уонна «Рапост» почта тэрилтэтэ тэрийбит «Подари подписку детям» үтүө санааланыы аахсыйатыгар кыттыстылар.
Эмис эбээлэрэ саха норуодунай бэйиэтэ В.М. Новиков – Күннүк Уурастыырап, аар-саарга аатырбыт олоҥхоһут Түмэппий Чээбий, саха күөрэгэйэ Екатерина Захарова төрөөбүт-үөскээбит Эмис нэһилиэгин дьонуттан истиҥ эҕэрдэлэрин тиэрдэн туран, бу курдук санааларын үллэһиннилэр: «Биһиги бары сиэннэрдээх, эбээ диэн үрдүк ааты сүгэ сылдьар дьоммут. Эбээ үөрэтэр-такайар үөрэҕэ тугунан да сыаналаммат. Ордук оҕо төрөөбүт тылынан хаһыаты, сурунаалы кыра эрдэҕиттэн ааҕар буоларыгар эбээ көмөтө сүрдээх улахан. Ол иһин Эмис нэһилиэгин эбээлэрэ анаан-минээн бу тэрээһиҥҥэ кыттыыны ылабыт. Бу кэлэн турар эбээлэр бука бары Абыйга, Дьокуускайга, Хаҥаласка, Эмискэ олорор сиэннэрбитигэр «Чуораанчык», «Колокольчик» сурунааллары суруттардыбыт. Маны таһынан Эмис нэһилиэгэр ситиһиилээхтик үлэлиир урбаанньыт Галина Ивановна Бубякина элбэх оҕолоох ыалларга түөрт устуука оҕо сурунаалын бэлэхтиир. Кумааҕы сурунааллар, хаһыаттар баар буолалларын туһугар оҕо бэчээтин кыһатын үлэһиттэрэ туруулаһыҥ, үлэлээҥ! Ааҕар ыччат үүнэн-сайдан тахсарыгар Эмис нэһилиэгин эбээлэрэ бииргэ үлэлэһэргэ бэлэммит».
«Көлүкэчээннэр» салгыы Үһүс көлүөнэ оскуолаҕа ыалдьыттаатылар. Дириэктэр эбээһинэһин толорооччу Пелагея Юрьевна Пряздникова, оҕуруо куруһуогун салайааччыта Нина Федоровна Артамонова, Мария Ивановна Данилова салайааччылаах хомус ансаамбыла, Үһүс көлүөнэ оскуола биир көхтөөх кыттааччыта Марфа Степановна Федорова «көлүкэчээннэри» үөрэ-көтө көрсөн, үлэлэрин уопутун атастастылар.
— Эмис нэһилиэгин эбээлэрэ быйыл Калининградка биһиги оскуолабыт ыытар үлэтин уопутун тарҕатар тэрээһиннэригэр олус көхтөөхтүк кыттыбыккыт. Саастаах дьон мустан, бииргэ сылдьарбыт, түмсэрбит олус үчүгэй. Биһиги оскуолабыт иһинэн олус элбэх куруһуок үлэлиир, 23 педагогтаахпыт. Алтынньы ыйга үлэбит түмүгүн көрдөрөр кэнсиэр, быыстапка туруорабыт, — диэн директор эбээһинэһин толорооччу П.Ю. Пряздникова билиһиннэрдэ уонна «көлүкэчээннэргэ» Махтал сурук туттарда.
Үһүс көлүөнэ оскуолата уонна Эмис нэһилиэгин эбээлэрэ салгыы бииргэ үлэлиир хайысхаларын кэпсэттилэр.
“Саха сирэ” хаһыакка, edersaas.ru саайтка анаан Сардаана МАТВЕЕВА.