Эбээн Бытантай улууһугар ситэриилээх былаас отчуотун бырабыыталыстыба бэрэссэдээтэлин бастакы солбуйааччы — тыа хаһаайыстыбатын уонна ас-үөл бэлиитикэтин миниистирэ Петр Алексеев салайааччылаах биригээдэ туруорда.
Үс нэһилиэктээх дьоҕус, хотугу улуус олохтоохторо сүрүннээн кыбартаалынай хочуолунай тутуутун туруорустулар. Кустуур орто оскуолатын хочуолунайыгар 62 ыал дьиэтэ холбоммут. Чааһынай дьиэлэри киин ититэр ситимҥэ холбуурга туһуламмыт бырагыраамма быйылгынан үлэлээн бүппүт. Онон 57 ыал, эбэтэр бөһүөлэк аҥаара ититиигэ холбоммокко хаалбыт. Олохтоохтор өссө «Полярные Авиалинии» хампаанньа үлэтин бэрээдэктииргэ эттилэр. Сөмөлүөккэ көтөр биир киһиэхэ 20 киилэ эрэ тутуур көҥүллэнэр буолан, элбэх таһаҕас, ол иһигэр наадалаах эмп-томп, почта хаалан хаалаллар, ол эрээри “кэннинэн” быһаарсар эргиэмсиктэргэ хааччах суох эбит. Итини холобурдаан тураннар, олохтоохтор хонтуруоллуурга модьуйдулар.
Улуус киинигэр, Баатаҕай Алыытыгар, сүрүн боппуруос саҥа түөлбэ дьиэлэрин ититэр ситимҥэ киллэриигэ туһаайылынна. Түөлбэҕэ олорор 66 ыал дьиэтэ ититии ситимигэр холбоммокко, маһынан оттуналлар. Биир массыына мас сыаната 16 тыһ. солк. буоллаҕына, биир ыал кыстыырыгар ортотунан түөрт-биэс массыына мас наада. Аны манна чугаһынан мас суох, бэрт ыраахтан тиэйэн аҕалаллар. Бу ыаллары барыларын ититии ситимигэр холбуурга билигин үлэлиир хочуолунай кыамтата эппиэттээбэт. Нэһилиэнньэ уонча сыл устата туруорсар кыһалҕата үп-харчы кырыымчыгыттан быһаарылла илик. ОДьКХ миниистирин солбуйааччы Виталий Руфов ирдэбил быһыытынан, социальнай эбийиэктээх эрэ түөлбэҕэ хочуолунай тутулларын быһаарда. Онон боппуруос быһаарылларын туһугар Бырабыыталыстыба Баатаҕай Алыытыгар оскуола тутуутун инвестбүддьүөккэ киллэрэрэ ирдэннэ, оччотугар эрэ киин хочуолунай тутуллан, чааһынай дьиэлэргэ ититии ситимэ тардыллар кыахтаах эбит.
Екатерина Захарова, Саха сирэ” хаһыат, edersaas.ru. сайтыгар анаан.