Бүгүҥҥүттэн, муус устар 11-тэн, Смоленскай куоракка уолаттар ортолоругар көҥүл тустууга Арассыыйаҕа бастыыр иһин турнир саҕаланар. “Юбилейнай” Спорт дыбарыаһыгар ыытыллар түөрт күннээх күрэхтэһиигэ 21 диэри саастаах эдэр бөҕөстөр күрэс былдьаһыахтара.
Бу түһүлгэҕэ Саха сирин күүстээх эдэр бөҕөстөрө бары тустуохтара. Өрөспүүбүлүкэ уолаттарга сүүмэрдэммит хамаандатын сүрүн тириэньэрэ Станислав Захаров Sportyakutia.ru иһитиннэрбитинэн, Смоленскай көбүөрүгэр Спорт үрдүкү спортивнай маастарыстыбатын оскуолатыттан, олимпийскай солбук училищетыттан уонна Чурапчытааҕы спорт кииниттэн 23 тустуук саамай ыарахантан ураты тоҕус ыйааһыҥҥа күүһүн холоһуоҕа.
Саха Өрөспүүбүлүкэтин сүүмэрдэммит хамаандата
57 кг — Петр Копылов, Алексей Копылов (ШВСМ-УОР), Игорь Петров (УОР), Петр Константинов (УОР), Айсен Винокуров (УОР), Быйаман Яковлев (РЦСП)
61 кг — Виталий Неустроев (УОР), Валентин Судинов (УОР), Георгий Кычкин (УОР), Христофов Потапов (РЦСП), Владислав Кривошапкин (РЦСП)
65 кг — Николай Иванов (ШВСМ), Айсен Потапов (УОР), Роман Михайлов (УОР)
70 кг — Егор Захаров (УОР), Стив Попов (РЦСП)
74 кг — Ньургустан Брощев (УОР)
79 кг — Алексей Ефимов (ШВСМ)
86 кг — Александр Филиппов (УОР)
92 кг — Максим Толмачев (УОР), Богдан Овчинников (ШВСМ)
97 кг — Андрей Аронов (УОР)
Бу түһүлгэ түмүгүнэн аан дойду, Европа чөмпүйэнээттэригэр кыттар хамаанда сүүмэрдэниэҕэ. Бу туһунан Арассыыйа уолаттарга сүүмэрдэммит хамаандатын сүрүн тириэньэрэ Петр Юмшанов иһитиннэрэн турар.
Роман ПОПОВ, “Саха сирэ” хаһыат, edersaas.ru