Эдэр профессионаллар чөмпүйэнээттэриттэн Cаха сирэ биэс мэтээллээх кэллэ
Бу күннэргэ Краснодар куоракка Эдэр профессионаллар (WorldSkills Russia) чөмпүйэнээт финала буолан ааста. Манна Саха сирин сүүмэрдэммит хамаандата кыттан 5 (2 кыһыл, 2 үрүҥ көмүс, 1 боруонса) мэтээллээх кэллэ.
Людмила ПОПОВА, edersaas.ru
Ол курдук, физико-техническэй институт устудьуона Андрей Тихонов “Реверсивнэй инжиниринг” компетенцияҕа, Дьокуускайдааҕы торговай-экономическай кэллиэс потребительскай кэпэрээссийэҕэ устудьуона Дайаана Дьяконова “Ресторан сервиһэ” компетенцияҕа бастакы миэстэни ыллылар. Оттон “Сыбаарка технологията” компетенцияҕа Мирнэйдээҕи региональнай техническэй кэллиэс устудьуона Владислав Внуков уонна “Ювелир дьыалата” компетенцияҕа Дьокуускайдааҕы промышленнай техникум устудьуона Егор Федоров иккис миэстэлэннилэр. Үһүс миэстэҕэ Дьокуускайдааҕы промышленнай техникум устудьуона Алина Григорьева (“Ювелирнай олордууну чочуйуу”) таҕыста.
Уопсайа 109 компетенцияттан биһиги оҕолорбут 21-гэр кытыннылар. Инньэ гынан, хамаанданан түмүккэ Саха сирэ 10 иһигэр киирдэ. Арассыыйа бары региона кыттар күрэхтэһиитигэр, ити куһаҕана суох көрдөрүү диэххэ сөп. Хайҕаллааҕа баар – сыллата көрдөрүүлэрэ тупсан иһэр. Үс бастыҥ миэстэни туһааннааҕынан Москва, Татарстан Өрөспүүбүлүкэтэ, Краснодарскай кыраай үллэһиннилэр.
Устудьуоннары сэргэ JuniorSkills III национальнай чөмпүйэнээккэ Өктөмнөөҕү научнай-үөрэтэр киин үөрэнээччилэрэ “Аэрокосмическай инженерия” (Егор Большаков, Станислав Охлопков, Иван Пахомов), Дьокуускай куорат В.П.Ларионов аатынан физико-техническэй лицей үөрэнээччилэрэ “Химия лабораторнай анаалыһа” (Татьяна Степанова, Алексей Старостин), Горнай улууһун эбии үөрэхтээһин киинин иитиллээччилэрэ «Мультимедийнэй суруналыыстыка» (Марсель Данилов, Алена Никифорова) компетенцияларга үһүс миэстэни ыллылар.
Үгүс кыттааччылар төһө даҕаны миэстэлэспэтэхтэрин иһин, ылбыт, иҥэриммит билиилэрин кэнэҕэскитин үөрэхтэригэр, үлэлэригэр туһаналлара саарбаҕа суох.
Людмила ПОПОВА, edersaas.ru
Андрей СОРОКИН хаартыскаҕа түһэриитэ.