Саха сирин Суруйааччыларын сойууһун иһинэн Эдэр литератордар сэбиэттэрэ тэрилиннэ. Бу маннык Сэбиэт соторутааҕыта Арассыыйа Суруйааччыларын сойууһугар эмиэ тэриллибитэ. Сэбиэти эдэр прозаик, кириитик Андрей Тимофеев салайар.
Бу хамсааһын сыыйа регионнарга тарҕаныахтаах. Ол эрээри сорох регионнарга эдэр суруйааччылара суох буолан, тэриллэр кыахтара суоҕун биллэрдилэр. Бу маннык Сэбиэттэри тэрийии сыалынан-соругунан айар куттаах эдэр дьон көҕүн уһугуннарыы, тэрийэр дьоҕурдарын, эппиэтинэстэрин көҕүлээһин, ону тэҥэ, солбугу үүннэрии буолар.
Саха сиринээҕи сэбиэти салайар муоһаны эдэр поэт Рустам Каженкин тутта. Суруйааччы сойууһун эдэр чилиэннэрэ, уонча киһи, хайыы-үйэ көрсөн, Сэбиэт үлэтин-хамнаһын торумнаатылар.
Кинигэлэри, альманахтары таһаарыы, “төгүрүк остуоллары” ыытыы, улуус айар түмсүүлэрин кытта үлэлэһии, эдэр ааптардары түмүү, тылбаастаныы уонна өрөспүүбүлүкэ тас өттүгэр бэчээттэнии, куонкурустарга кыттыы, кириитикэҕэ эдэрдэри кытыннарыы, улуустарынан десант, куонкурустары ыытыы, аудио-кинигэлэри таһаарыы, оҕо лааҕырдарын үлэлэтии, оскуолаларга сылдьыы, о.д.а. үлэни торумнаатылар, хайысхаларынан эппиэттээх дьону анаатылар.
Cойуус бырабылыанньатыттан Сэбиэти кытта үлэҕэ эппиэттээҕинэн бэрэссэдээтэли солбуйааччы Гаврил Андросов ананна.
Ангелина Васильева, “Саха сирэ” хаһыат, edersaas.ru