Алтынньы 12 күнүгэр Уус Алдан улууһун Н.Н.Тарскай аатынан Баатаҕай орто оскуолатыгар эдэр учууталларга аналлаах «Эдэр учуутал оскуолатын» уочараттаах дьарыга буолан ааста. Тэрээһиҥҥэ Чараҥ, Сыырдаах, Уһун Күөл, Өнөр, Хоноҕор, Мындааба, Курбуһах оскуолалара, Мүрүтээҕи уолаттар гимназиялара кэлэн кыттыыны ыллылар.
edersaas.ru
Баатаҕай оскуолатын үлэһиттэрэ кэлбит ыалдьыттары улахан күүттэриитэ суох, болдьоммут кэмигэр тэрээһини саҕалаатылар. Аан тылы улуустааҕы управление салалтатын сүрүннүүр исписэлииһэ М.М.Петухова эттэ, ол кэннэ Баатаҕай эдэр, талааннаах учууталлара кэлбит ыалдьыттарга эҕэрдэ нүөмэрдэри бэлэхтээтилэр.
Аан тыл кэннэ, үгэс быһыытынан, кылаастарынан арахсан уруок ыытыытын көрдүбүт. Саҥа үлэлэрин саҕалаан эрэр уһуйааччылар диэтэххэ, хайыы-үйэ бэйэлэрин анал үөрэхтэрин баһылаабыт дьон быһыытынан, бары ирдэбилгэ эппиэттиирдик ыыппыттара олус кэрэхсэбиллээх. Уруок ыытыытыгар Хоноҕор, Өнөр, Сыырдаах, Баатаҕай, Курбуһах, Мындааба оскуолалара кытыннылар. Ордук чуолаан бэлэмнээх кэлбит оскуолаларынан, мин санаабар, Сыырдаах, Өнөр, Хоноҕор оскуолалара буолаллар.
Уруок ыытыытын кэннэ Баатаҕай оскуолатыгар баар Н.Н.Тарскай аатын сүгэр баай историялаах түмэли түмэл салайааччыта, өр кэмҥэ үлэлээбит учуутал К.И. Румянцева көрдөрдө. Күнүскү өттүгэр Култуура киинигэр улуустааҕы оҕо спортивнай оскуолатын тренерэ Н.А. Николаев өбүгэ оонньууларыгар маастар-кылаас ыытта.
Маастар-кылаас кэмигэр кэлбит ыалдьыттарга хабылык күрэҕэ ыытылынна.
1 миэстэни М.М. Петухова
2 миэстэни Л.С. Колесова
3 миэстэни А.Н.Копырин ыллылар.
Киэһээҥҥи өттүгэр, буоларын курдук, КВН күрэҕин көрдүбүт. Дьэ, бу манна биэс оскуола кыттыыны ылла. Күрэҕи Култуура киинин эдэр исписэлииһэ Мария Бережнева олус тэрээһиннээхтик ыытта. Хамаандалар бары бэлэмнээх кэлбиттэрэ тута харахха быраҕыллар. Ырыа-тойук, үҥкүү-битии, көр-күлүү эгэлгэтэ дьэ, манна буолла. Кыайыылааҕы быһаарыыга уустуктар тахсыах курдук түгэннэрэ көстөн аастылар.
Бу да сырыыга былырыыҥҥы күрэх кыайыылаахтара баатаҕайдар үрдүк ааттарын түһэн биэрбэтилэр. Көһө сылдьар кубок хаһаайыннарынан ааттаннылар. Иккис миэстэни көхтөөх Өнөр хамаандата ылла, үһүс миэстэни Уһун Күөл хамаандата ылары ситистэ. Күрэх кэннэ анал ааттар туттарылыннылар. Кэлбит ыалдьыттары саха балаҕаныгар ирэ-хоро кэпсэтэн, саха дьонун сиэринэн, итии чэйдээх, сандалы маанылаах аһынан күндүлээн атаардылар. Өссө да маннык тэрээһиннэр сылы эргиччи, тиһигин быспакка ыытылла турдуннар.
Игнатий СЛЕПЦОВ, «Саха сирэ» хаһыат, edersaas.ru