Өрөспүүбүлүкэҕэ “Олорор дьиэ” федеральнай бырагыраама иһинэн “Эдэр ыаллары дьиэнэн хааччыйыы” хос бырагыраама үлэлиир. Билиҥҥи туругунан, өрөспүүбүлүкэ үрдүнэн 4 тыһыынчаттан тахса эдэр ыал уочаракка турар. Улуустарга бу бырагырааманан СӨ тутууга, архитектураҕа министиэристибэтэ дьарыктанар. Оттон Дьокуускай куоракка “Департамент жилищных отношений” нөҥүө субсидия бэриллэр.
Ангелина Васильева, «Саха сирэ» хаһыат, edersaas.ru
Былырыын бэрт кылгас болдьох кэм иһигэр СМС нөҥүө сайаапкалары ылбыттара. Онно ким эрэ билбэккэ хаалан, ким эрэ хойутаан, үгүс киһи сайаапка биэрбэккэ хаалбыта. Быйыл ити ньыманы тохтотон, бэс ыйын 1 күнүттэн 30 күнүгэр диэри сайаапкалары ылыахтара. Ким эрдэ тиийбит, эрдэ уочаракка турар.
Элбэх ыйытыы киирбитинэн, департамент тус сыаллаах бырагыраамаларын отделын начаалынньыга Юлия Коваленконы кытары кэпсэттибит.
— Быйыл өрөспүүбүлүкэҕэ 361 мөл. солкуобайдаах федеральнай үп кэллэ. Ону улуустарга үллэриэхтэрэ, куоракка сүүсчэкэ ыал ылара буолуо. Өрөспүүбүлүкэ бүддьүөтүттэн 250 мөл. көрүлүннэ.
Дьокуускай куоракка үбүлээһин 117 мөл. солк. тэҥнэһэр. Киин куоракка 602 ыал уочаракка турар. Иллэрээ сыл 94, былырыын 28 ыал субсидия ылбыттара. Билигин 2008 сылга уочаракка турбуттар бары ыллылар, быйыл 2009, 2010 сыллаахтар уочараттара кэллэ. Түгэнинэн туһанан, 2009, 2010 сылларга уочаракка турбут дьону кэлэн билсэргитигэр ыҥырабыт. Ким эрэ суотабайа уларыйбыт, ким эрэ дьиэ ылбыт, сорох 35 сааһын туолбут. Манна даҕатан эттэххэ, кэргэнниилэртэн биирдэстэрэ 35 сааһын туолла да, уочараттан тахсаллар. Онон уочараты чуолкайдыырга, кэлэн билсиҥ.
— Оҕолоннохторуна, 5 %-наах эбии төлөбүр баар диэн эбит дии, ол тугуй?
— Сертификат ылбыттарын кэннэ, 7 ый иһинэн туһаныахтаахтар: дьиэ туттан, эбэтэр атыылаһан. Бу кэм иһигэр туттубакка хааллахтарына, сертификат таах хаалар. Ону тэҥэ, бу 7 ый иһигэр оҕо төрөөтөҕүнэ, эбии 5 %-наах төлөбүр бэриллэр. Холобур, эдэр ыал 900 тыһ солкуобайдаах субсидия ылбыт буоллаҕына, оҕо төрөөтөҕүнэ 45 тыһ. солкуобайы эбии ылар.
— Чэпчэтии диэн баар дуо?
— 2005 сыл кулун тутар 1 күнүгэр диэри уочаракка турбут ыаллар уонна үстэн элбэх оҕолоохтор чэпчэтиилээхтэр. Үһүс оҕо төрөөтөҕүнэ, уочаракка инники диэки хамсаан биэрэллэр.
Маннык аадырыска тиийэн билсиэххитин сөп: “Департамент жилищных отношений”, Дьокуускай к., Дзержинскэй уул, 21, каб. 13 (урукку “Найрамдал” маҕаһыын дьиэтэ). Төл.: (4112) 22-60-18. Эбэтэр dgoyakutsk.ru сайтынан киирэн билсиҥ.
Кимнээх хапсалларый?
1. Бырагыраамаҕа 35 саастарын туола илик эдэр ыал кыттар. Аҥаардас төрөппүт оҕотун кытары эмиэ буолуон сөп.
2. Олорор дьиэҕэ наадыйар буолуохтаах: дьиэтэ суох, эбэтэр кыараҕас дьиэлээх (дьиэ кэргэн хас биирдии чилиэнигэр 9 кв. м. элбэҕэ суох тиксиэхтээх).
3. Дьиэ 60%-нын төлүүр кыахтаах буолуохтаахтар.
4. Бастайааннай прописка ирдэнэр.
5. Олорор дьиэ бырагырааматынан судаарыстыбаттан көмөнү урут ылбатах буолуохтаахтар.
Субсидия кээмэйэ
Оҕото суох ыалларга дьиэ сыанатын 30%-на;
оҕолоох ыалларга уонна аҥаардас төрөппүккэ — 35%-на бэриллэр.
Дьиэ 1 кв. м. сыанатын РФ Регионнары сайыннарыы министиэристибэтэ быһаарар. 2016 сылга 1 кв. м. сыанатын 47 098 солкуобайынан быспыттара.
Холобур: 4 киһилээх дьиэ кэргэҥҥэ төһө тиксэрин суоттуубут (олорор дьиэҕэ норматив биир киһиэхэ 18 кв.м.).
Дьиэ сыанатын суоттааһын: 18 х 4 х 47 098 = 3 391 056 солк.
Субсидия кээмэйин суоттааһын: 3 391 056 х 35% = 1 186 869 солк.
Субсидияны хайдах туһанабыт?
1. Дьиэни атыылаһарга;
2. Дьиэни тутар биригээдэ бэдэрээтин төлөһөргө;
3. Эдэр ыал, эбэтэр кэргэнниилэртэн биирдэстэрэ дьиэ кэпэрэтиибин чилиэнэ буоллаҕына, усунуоһу төлөһөргө;
4. Ипотечнай кирэдьиит бастакы усунуоһун төлөһөргө;
5. Саҥа тутуллар эконом кылаастаах дьиэни ыларга дуогабарын төлөһөргө;
6. Ипотечнай кирэдьиит иэһин сүрүн сууматын сабарга.
Ханнык докумуоннар ирдэнэллэр?
1. Сайабылыанньа;
2. Пааспар, оҕо төрөөбүтүн туһунан сибидиэтэлистибэ, ИНН;
3. Кэргэннии буолуу, эбэтэр арахсыы туһунан сибидиэтэлистибэ;
4. БТИ ыспыраапката (Дьокуускай к., Киров уул., 28, каб. 108);
5. Эдэр ыал пропискаламмыт дьиэтин туоһулуур докумуоннар (судаарыстыбаннай регистрация сибидиэтэлистибэтэ, ордер, кадастровай пааспар, о.д.а.);
6. Дохуоту мэктиэлиир докумуоннар (2-НДФЛ ыспыраапка, үлэ киниискэтин куоппуйата, Ийэ хапытаалын сертификата, о.д.а.);
7. Персональнай дааннайдары харайыыга сөбүлэһии (суругунан);
8. Эбии кирэдьиит сүрүн иэһин сууматын уонна бырыһыаннарын төлөһөргө маннык докумуоннар наадалар:
а) дьиэни бас билии судаарыстыбаннай регистрациятын сибидиэтэлистибэтин куоппуйата;
б) кирэдьиит дуогабарын куоппуйата;
в) кирэдьиит биэрбит тэрилтэ төһө суума хаалбытын туһунан ыспыраапката.
Салгыы манна көр: «Эдэр ыаллары дьиэлииргэ федеральнай үп көрүлүннэ«
Ангелина Васильева, «Саха сирэ» хаһыат, edersaas.ru