Бэҕэһээ, балаҕан ыйын 7 күнүгэр, Өксөкүлээх Өлөксөй аатынан Норуоттар доҕордоһууларын дьиэтигэр Эдьигээн эбэҥки национальнай оройуонун күннэрин чэрчитинэн уопсастыбаннас үөрүүлээх мунньаҕа буолла.
edersaas.ru
Эдьигээн с. олохтоммута 385 сылыгар аналлаах долгутуулаах тэрээһин кыттыылаахтарын СӨ Бырабыыталыстыбатын бэрэссэдээтэлин бастакы солбуйааччы, Дьокуускай куоракка Эдьигээн күннэрин тэрийэр кэмитиэт бэрэссэдээтэлэ Петр Алексеев, СӨ Судаарыстыбаннай Мунньаҕын (Ил Түмэн) бэрэссэдээтэлэ Александр Жирков, СӨ гражданскай уопсастыба институтун сайыннарыыга миниистирэ Сардаана Гурьева, Арктика дьыалаларыгар СӨ судаарыстыбаннай кэмитиэтин бэрэссэдээтэлэ Прокопий Николаев, Эдьигээн эбэҥки национальнай оройуонун баһылыга Алексей Мандаров, Эдьигээн эбэҥки национальнай нэһилиэгин баһылыга Василий Сорокин, СӨ аҕыйах ахсааннаах төрүт норуоттарын ассоциациятын бэрэссэдээтэлэ Андрей Кривошапкин, Дьокуускай к. уокуругун баһылыгын солбуйааччы Георгий Михайлов, СӨ тыа хаһаайыстыбатын туйгуна, Эдьигээн оройуонун бочуоттаах олохтооҕо Николай Саввинов эҕэрдэлээтилэр.
Кинилэр бэйэлэрин этиилэригэр Эдьигээн оройуонун баай историятын аҕыннылар. Оройуон уһулуччулаах дьонугар, ол иһигэр саха литэрэтиирэтин уонна суругун-бичигин төрүттээччилэртэн биирдэстэрэ Афанасий Уваровскойга, бэйэтин үлэтин Эдьигээн улууһуттан саҕалаабыт, Саха сирин бастакы Президенэ Михаил Николаевка, сахалартан бастакы олимпийскай чемпион Роман Дмитриевкэ, САССР норуотун хаһаайыстыбатын үтүөлээх үлэһитэ Николай Винокуровка, СӨ Судаарыстыбаннай Мунньаҕын бэрэстэбиитэллэрин палататын бастакы бэрэссэдээтэлэ Афанасий Илларионовка уо.д.а. ытыктабыл тылларын анаатылар.
Төрөөбүт улуустарын уонна өрөспүүбүлүкэ сайдыытыгар бэйэлэрин кылааттарын киллэрсэ сылдьар уһулуччулаах дьоннорго СӨ бырабыыталыстыбатын, Ил Дархан, Судаарыстыбаннай Мунньах (Ил Түмэн), министиэристибэлэр үрдүкү наҕараадаларын туттардылар.
Чурапчы улууһун баһылыга Андрей Ноговицын икки улуус үйэлээх сыһыаннарын бэлиэтээн туран, ыалдьыттары Чурапчы улууһун олохтоохторун ааттарыттан эҕэрдэлээтэ.
СӨ Судаарыстыбаннай Мунньаҕын бэрэссэдээтэлэ Александр Жирков бэлиэтээбитинэн, 1942 с. биэс тыһыынча кэриҥэ киһи хотугу улуустарга (ол иһигэр, Эдьигээн оройуонугар 1997 кэриҥэ) көһөрүллүбүтэ. Көһөрүллүү кыттыылаахтарын оҕолоро, сиэннэрэ соторутааҕыта Эдьигээн оройуонугар баран, сэрии кытаанах сылларыгар көһөрүллүбүт дьоҥҥо туох кыалларынан көмөлөспүттэригэр махтал тылларын тириэрдэн кэлбиттэрэ.
Оройуон баһылыга Александр Мандаров Дьокуускайга хас да күн устата ситиһиилээхтик ыытыллыбыт тэрээһиннэри өйөөбүт, кыттыыны ылбыт дьоҥҥо махталын биллэрдэ.
Үөрүүлээх тэрээһин Эдьигээн улууһун айар талааннаахтарын кэнсиэринэн түмүктэннэ. Кэнсиэркэ «Аюкта» оҕолор бэстибээллэрин кыттыылаахтара, өрөспүүбүлүкэҕэ, Арассыыйаҕа тиийэ биһирэнэр үҥкүү ансаамбыллара, ырыаһыттар уо.д.а. кытыннылар. Көрөөччүлэр хас биирдии нүөмэри: толорооччулар эбэҥки норуотун үгэстэрин, оһуорун-мандарын илдьэ сылдьар баай көстүүмнэрин, ураты тэтимнээх үҥкүүлэрин, ырыаларын ис сүрэхтэриттэн дуоһуйа көрүстүлэр.
Надежда ЕГОРОВА, «Саха сирэ» хаһыат, edersaas.ru
Василий Кононов уонна ааптар түһэриилэрэ
…