«Эдьигээн сонуннара» хаһыат 65 сыллаах үбүлүөйүн далааһыннаахтык бэлиэтээтэ

Бүгүн «Сахамедиа» пресс-киинигэр сэргэх тэрээһин буолла. Суруналыыстар бырабылыанньаларын киэҥ ыҥырыылаах мунньаҕар Эдьигээн улууһа төрүттэммитэ 385, улуус хаһыата тэриллибитэ 65 сыллаах үбүлүөйдэрин үөрүүлээх быһыыга-майгыга бэлиэтээтилэр.

 Улуус хаһыата оччолорго “Социализм сардаҥата” диэн ааттанан, аан маҥнай сэтинньи 21 күнүгэр 1952 сыллаахха күн сирин көрбүт. Онтон ыла силис тардан силигилээн, үлэтэ сайдан-кэҥээн, суруналыыстар улуустарын, хотугу сир хоһуун дьонун олоҕун-дьаһаҕын, үлэтин-хамнаһын хайдах баарынан, кырдьыгынан сырдатан, сыралаах үлэлэрин өрө тутан кэллилэр.

Хаһыат кылаабынай эрэдээктэрэ Алексей Матвеев иһитиннэрбитинэн, 4300 нэһилиэнньэлээх оройуоҥҥа икки тылынан (сахалыы, нууччалыы) тахсар хаһыат күн бүгүн 720 ахсаанынан бэчээттэнэн тарҕанар. Эрэдээксийэҕэ уопсайа 11 киһи үлэлиир. Ааҕааччы болҕомтотун тардар туһуттан үлэлэрин кэҥэтэн, далааһыннаан иһэллэрин, былаан, бырайыак баһырхайын, куонкурустар, араас тэрээһиннэр тиһиктээхтик ыытыллалларын эттэ.

Күүтүүлээх уонна долгутуулаах күҥҥэ улуус хаһыатыгар араас сылларга үлэлээбит дьон, өрөспүүбүлүкэ суруналыыстара, Эдьигээнтэн төрүттээхтэр мустан үөрүүнү үксэтистилэр, санааларын үллэһиннилэр, эҕэрдэлэрин тиэртилэр.

«Сахабэчээт» АТ сүрүн  дириэктэрэ Филипп Пестряков улуус хаһыата бу курдук өрөспүүбүлүкэ киинигэр кэлэн үбүлүөйүн бэлиэтээһинэ сонун көстүү буоларын ыйда. Бэчээт Департаменын сүнньүнэн 2000 сылтан тоҕус улууска дойду дьонун ыытан үлэлэппиттэрин, ол улуустар хаһыаттарыгар төһүү буолбутун бэлиэтээтэ. Ол кэмнэргэ үлэлээбит уонна билигин да үлэлии, айа-тута сылдьар эрэдээктэрдэри ааттаталаата. Эдэр дьон төрөөбүт дойдуларын, тыа сирин хаһыаттарыгар баран тахсыылаахтык үлэлииллэриттэн үөрэрин, кинилэринэн киэн туттарын эттэ. Салгыы «Эдьигээн сонуннара» эрэдээктэрин Алексей Матвеевы оҕо саадыгар сылдьыаҕыттан билэрин, үтүөкэн үлэһит киһиэхэ эрэнэрин биллэрдэ, ситиһиилэри баҕарда. Дохсун ытыс тыаһыгар доҕуһуоллатан эрэдээксийэни бэлиэ дааталарынан истиҥник эҕэрдэлээтэ, сэртипикээт туттарда. Улуус баһылыгар Алексей Мандаровка хаһыаты өйүүрүн иһин улаханнык махтанна.

Дьоро киэһэ эҕэрдэлэрин СӨ култуура үтүөлээх үлэһитэ, бэйиэт, прозаик, критик Семен Попов-Сэмэн Тумат, Арассыыйа Суруйааччыларын сойууһун чилиэнэ, бэйиэт Саргылана Гольдерова-Саргы Куо, СӨ норуодунай бэйиэтэ Иван Мигалкин, суруналыыстар сойуустарын бэрэссэдээтэлэ Галина Бочкарева, ааспыт сылларга бэрэссэдээтэллээбит, СӨ култуура үтүөлээх үлэһитэ Иван Борисов, о.д.а. истиҥ эҕэрдэлэрин тиэртилэр.

«Эдьигээн сонуннара» хаһыат кэлэктиибэ аҕалбыт быыстапката ыалдьыттар болҕомтолорун татта.

Биһиги корр., «Саха сирэ» хаһыат, edersaas.ru