Бэҕэһээ Красноярскайга, ССРС, Грузия, Россия үтүөлээх тренерэ Дмитрий Миндиашвили аатынан Тустуу академиятын аһаҕас чөмпүйэнээтэ ыытыллан түмүктэннэ. Күрэхтэһии, балаһыанньа быһыытынан, эр дьоҥҥо уонна дьахталларга көҥүл тустуу көрүҥэр ыытылынна. Бу аһаҕас күрэхтэһиигэ биир үксүн Сибиир, Уһук Илин регионнарын тэҥэ тас дойдуттан Казахстан, Кытай бөҕөстөрө кыттыыны ыллылар. Саха сириттэн, сүрүннээн, эдэрдэр күүстэрин холостулар.
Онуоха биһиги бөҕөстөрбүтүттэн ордук үчүгэй көрдөрүүнү Чурапчытааҕы физическэй култуура уонна спорт институтун устудьуона Эдуард Григорьев (тренерэ Данил Неустроев) ситистэ. Кини 57 киилэҕэ барыта 64 утарсааччытын кэннигэр хаалларан, көбүөргэ тахсан сэттэтэ тустан, бастакы миэстэни эрэллээхтик хааччынна. Бүтэһик быһаарыылаах хапсыһыыга тувинец Майдыр Донгагы 11:1 ахсаанынан ыраастык кыайбыта даҕаны ону кэрэһилиир. Манна даҕатан эттэххэ, Эдуард бу кылгас кэм иһигэр үстэ күрэхтэһэн – үһүөннэригэр бастакы миэстэни ылла. Ол курдук, сэтинньигэ — Дьокуускай куорат, тохсунньу саҥатыгар — Үрдүкү спортивнай маастарыстыба оскуолатын уонна бу, Красноярскайдааҕы Тустуу академиятын аһаҕас чөмпүйэнээттэригэр наар кыайыыны ситистэ. Итинэн уолбут аны тохсунньу 27-29 күннэригэр Красноярскайга ыытыллар Иван Ярыгин аатынан норуоттар икки ардыларынааҕы Гран-при турнирга кыттар быраабы ылла. Киниэхэ ситиһиини баҕарыаҕыҥ!
Атын бөҕөстөрбүтүттэн бу түһүлгэҕэ Алексей Иванов (65 кг), Евгений Коломиец (125 кг) уонна Анжелика Парникова (58 кг), Ирина Афанасьева (60 кг) – пьедестал үһүс үктэлигэр таҕыстылар. Кэрэхсэбиллээҕэ баар, Коломиец, Парникова уонна Афанасьева – СӨ үтүөлээх тренерэ Ким Колодезников иитиллээччилэрэ.
Академия аһаҕас чөмпүйэнээтин эр дьоҥҥо күрэхтэһиитигэр бэйэлэрин ыйааһыннарыгар кыайыылаахтарынан буоллулар: 57 кг – Эдуард Григорьев (Саха сирэ), 61 кг – Булат Батоев (Бурятия), 65 кг – Менги Мортуй Оол (Тыва), 70 кг – Семен Терещенко (Хакасия), 74 кг – Никита Сучков, 86 кг – Эдуард Арутюнян, 97 кг – Анзор Уришев уонна 125 кг – Мухамази Магомедов (бары Красноярскайтан).
Петр ПАВЛОВ, edersaas.ru