Үөһээ Бүлүүгэ ыытыллар үбүлүөйдээх ХХ-с «Манчаары оонньууларын» бастакы күнүгэр күрэхтэһии үс рекорда тупсарылынна. Бу туһунан күрэхтэһии бастакы күнүн түмүгүн таһаарар судьуйалар уонна хамаанда бэрэстэбиитэллэрин мунньахтарыгар иһитиннэрдилэр.
Ол курдук, уолаттар 100 миэтэрэҕэ сырсыыларыгар Үөһээ Бүлүү быһыйа Николай Руфов дистанцияны 11.10 сөкүүндэнэн түмүктээн туйгун көрдөрүүлэннэ. Бу иннинэ кини үөлээннээхтэрэ Манчаары Оонньууларгыгар маннык бириэмэни көрдөрө иликтэрэ.
Марафоҥҥа Арассыыйа чөмпүйүөнэ Сардаана Трофимова биэс биэрэстэни 15 мүнүүтэ 48 сөкүүндэ 24 дэһээтэйинэн кэлэн, эмиэ Оонньуулар саҥа рекортарын хаһаайкатынан буолла. Сардаана сүрүн күрэстэһээччитинээн, Арассыыйа чөмпүйүөнэ Наталья Леонтьевалыын (Сунтаар) «Үс Хоһуун» стадиоҥҥа спорт маастарын нуорматын таһымынан сүүрбүттэрэ туһугар эмиэ дьоһун ситиһии, күрэхтэһии хаачыстыба өттүнэн эмиэ үүнэн-сайдан иһэрин туоһутунан буолла.
Хотугу многоборьеҕа Нерюнгри бэрэстэбиитэлэ Анна Кинчак сүгэни 93, 73 миэтэрэ ыраахха кыыратта. Кини иннинэ Оонньуулар кыттыылаахтарыттан ким да маннык түмүгү ситиһэ илигэ.
Роман ПОПОВ, «Саха сирэ» хаһыат, edersaas.ru
Ааптар хаартыскаҕа түһэриитэ.