Сардаана дуу, Наталья дуу? Маннык ыйытыы Үөһээ Бүлүүгэ ыытыллар Манчаары оонньууларын сүүрүүгэ күрэстэһиитин иккис күнүгэр эмиэ турда.
Бүгүн Арассыыйа чөмпүйүөннэрэ Сардаана Трофимова уонна Наталья Леонтьева үс биэрэстэҕэ сырсыыларын көрөөрү дьон сарсыардаттан «Үс Хоһуун» стадиоҥҥа муһунна. Сүүрүү үүт-маас бэҕэһээҥҥи киэбинэн барда. Старт бэриллээтин кытта Сардаана тута инники тахсан, сүүрүүнү баһылаата-көһүлээтэ. Наталья кинини тилэх баттаһа сырытта. Бу сырыыга кини сырсааччытын ситэн, иннигэр түһэргэ холоммото. Биэтэк чугаһыгар Сардаана тэтимин эппитигэр да, тутуһа сатаабата, ыытан кэбистэ.
Онон Сардаана эмиэ бэҕэһээҥҥи курдук, биир дойдулаахтара — үөһээ-бүлүүлэр — уруйдуур хаһыыларынан доҕуһуоллатан биэтэккэ соҕотоҕун дайан кэллэ. Көрдөрүүтэ — 9. 07. 48. Бу Саха Өрөспүүбүлүкэтин саҥа рекордунан буолар!
Наталья Леонтьева (Сунтаар) бириэмэтэ — 9. 10. 78. Дьокуускай сүүрүүгэ Ирина Осипова дистанцияны үсүһүнэн түмүктээтэ — 9. 56. 22.
Эр дьон биэс биэрэстэҕэ сырсыыларыгар Уус Алдан быһыйа Артур Бурцевы кытта атах уурсуох киһи көстүбэтэ. Кини дистанцияны 14 мүнүүтэ 37 сөкүүндэнэн түмүктээтэ. Тэҥҥэ тардыалаһыах сүүрүүк баара буоллар, бу бириэмэтин лаппа тупсарыа хаалла. Дьулустаан Елисеев (ХИФУ, 15. 18. 12), Егор Быганов (Чурапчы, 15. 29.38) иккис, үһүс буоллулар.
Дьахталлар уонна эр дьон сүүс миэтэрэҕэ сырсыыларыгар үөһээ-бүлүүлэр күннээтилэр: спорт маастарыгар хандьыдааттар Михаил Руфов (10.79) уонна Валентина Иванова (12.49) кими да тутуһуннарбатылар. Эр дьоҥҥо Сергей Чунарев (Дьокуускай), Михаил Жарин (Амма), дьахталларга Ольга Белова (Ленскэй), Светалана Рогозина (Мииринэй) бириистээх миэстэлэргэ таҕыстылар.
Роман ПОПОВ, «Саха сирэ» хаһыат, edersaas.ru
