Бүгүн Арассыыйа үрдүнэн быыбар буола турар. Бу бэлиэ күн куоласпытын биэрэр бары ытык иэстээхпитин умнуо суохтаахпыт.
Үөһээ Бүлүү сэлиэнньэтин уонна Үөдүгэй нэһилиэгин дьаһалталарын көҕүлээһининэн, Үөһээ Бүлүүгэ күнүс 12 чаастан «Дорообо, сандал саас!» диэн кыһыны атаарыы, норуот күүлэйэ саҕаланна. Анал тэрээһин чэрчитинэн, улуус киинигэр Дьокуускай куорат скверигэр кыһыны атаарыы бырааһынньыгын үөрүүлээхтик арыйыы кэнниттэн, «Кырыа кыһын барахсан, көрсүөххэ диэри» диэн анал театрализованнай дьүһүйүү, түөлбэлэр икки ардыларыгар көрдөөх эстэпиэтэ, ханаат тардыһыыта, атыы-эргиэн дьаарбаҥката, «Сандал сааһы уруйдуубут» кэнсиэр бэрт көхтөөхтүк ыытылла тураллар.
Үөһээ Бүлүү олохтоохторо Стелла, Александр Антоновтар оҕолорунаан кыһыны атаарыы тэрээһинигэр сылдьалларын көрсөн кэпсэттим.
—Биһиги быыбары адьас көтүппэппит. Оҕолорбутун кытта кыһыны атаарыыга сылдьан баран, 75 №-дээх быыбардыыр учаастакпытыгар баран куоластыахпыт. Саха сирин олохтоохторун сандал саас кэлбитинэн итиитик-истиҥник эҕэрдэлиибит», — диэн ыал аҕа баһылыга санаатын үллэһиннэ.
Александр ТАРАСОВ, «Саха сирэ» хаһыат, edersaas.ru сайтка анаан.