Бүгүн Арассыыйаҕа ис дьыала министиэристибитэ төрүттэммитэ 100 сылын чэрчитинэн, полиция үлэһиттэрин уонна ГИБДД Үөһээ Бүлүүтээҕи салаатын көҕүлээһининэн ыытыллыбыт тиэхиньикэ, саа-саадах, туттар мал-сал быыстапкатын дьон сэҥээрэ көрдө.
Быыстапкаҕа Макаров бэстилиэтиттэн саҕалаан Драгунов винтовкатыгар, Калашников автоматтарыгар, бронежилетигэр тиийэ туруоруллубуттар. Өссө маны ааһан «Патриот», «Трэкол”, ВАЗ 3121, буруйдаах дьону таһар анал массыына, мотуордаах оҥочо, буран туруоруллубуттарын көрөн: «Урут, бу тиэхиньикэлэри ыраахтан эрэ көрөр этибит. Билигин тутан-хабан, бэл олорсон, көрөр чиэскэ тигистибит», – диэн дьон астына кэпсээтилэр.
Сонун тэрээһин туһунан ГИБДД Үөһээ Бүлүүтээҕи салаатын начаалынньыга Гермоген Сибиряков:
– Биһиги улууспутугар маннык быыстапка бастакытын тэрилиннэ. Дьон олус сэҥээрдэ, ордук эр дьон уонна оскуола оҕолоро тоҕуоруһа муһуннулар. Оннооҕор уһуйаан иититиллээччилэрэ эмиэ кэлэн көрбүттэриттэн олус үөрдүбүт, соһуйдубут даҕаны», – диэн кэпсээтэ.
Валентина ДОГОЮСОВА, edersaas.ru сайтка анаан