Бүгүн Үөһээ Бүлүүгэ М.А.Алексеев аатынан гимназия базатыгар, Бүлүү бөлөх улуустарын оҕолоругар аналлаах технопаарка арылынна.
edersaas.ru
Тэрээһиҥҥэ СӨ үөрэҕин уонна наукатын миниистирин бастакы солбуйааччыта Феодосия Габышева, Үөһээ Бүлүү улууһун баһылыга Владимир Поскачин, улуустааҕы үөрэх управлениетын начаалынньыга Спиридон Борбуев, уо.да. а. кыттыннылар. Феодосия Васильевна: «Барыгытын Космонавтика күнүнэн эҕэрдэлиибин! 1965 сыллаахха Үөһээ Бүлүү улууһугар физико-техническэй кылаастар аһыллыбыттара. Ол аата техническэй хайысхаҕа ыччаты, каадыры бэлэмнээһиҥҥэ саамай бастыҥ уопут ууруллубута. Арасыыйа бэрэсидьиэнэ Владимир Путин дьаһалынан, дойду үрдүнэн 40-ча технопаарка аһыллан үлэлиэхтээх. Бу саҥа пааркаҕа оҕолор аҥаардас техническэй хайысхаҕа эрэ буолбакка, бары хайысхаларга дэгиттэр буола үөрэнэн тахсыахтаахтар«, – диэн эттэ. Салгыы улуус баһылыга Владимир Поскачин гимназия аттыгар технопаарка саҥа дьиэтин тутуу соруга турарын туһунан эттэ.
Үөһээ Бүлүүтээҕи үөрэх управлениетын начаалынньыга Спиридон Борбуев кэпсээбитинэн, инникитин технопааркаҕа Бүлүү бөлөх улуустарын оҕолоро кэлэн үөрэниэхтээхтэр. Соторутааҕыта Хоро оскуолатын базатыгар сааскы сынньалаҥҥа улуус 21 нэһилиэгиттэн кэлэн оҕолор эбии үөрэнэн, куруһуоктарга дьарыктанан барбыттар. Онтон бу саҥа технопаарк күһүн, кыһын 100-чэкэ оҕо кэлэн үөрэниэҕэ, дьарыктаныаҕа. Технопаарканы аһыы кэнниттэн ыалдьыттар, учууталлар, үөрэнээччилэр технопаарканы көрдүлэр-иһиттилэр.
Үөһээ Бүлүүтээҕи 4-с нүөмэрдээх орто оскуолатын 4-с «а» кылааһын үөрэнээччилэрэ Саша Иванов уонна Максим Николаев:
— Бу анал техническэй куруһуокка дьарыктаммыппыт сыл буолла. Олус интэриэһинэй. Роботтары таҥан оҥоробут уонна анал бырагыраама көмөтүнэн бу «тимир дьон» араас хамсаныыны оҥороллорун ситиһэбит, – диэн санааларын үллэһиннилэр.
Александр Тарасов, edersaas.ru сайтка анаан