Бүгүн Россиятааҕы Бибилэтиэкэ күнүгэр Үөһээ Бүлүүгэ үөрүүлээх күн буолла. Киин бибилэтиэкэҕэ мультимедийнай саала үлэҕэ киирдэ. Үөрүүлээх тэрээһиҥҥэ улуус баһылыга Владимир Поскачин уонна Үөһээ Бүлүү сэлиэнньэтин уопсастыбаннаһа сырытта.
Александр ТАРАСОВ, «Саха сирэ» хаһыат, edersaas.ru
Наталья Петрова, Үөһээ Бүлүүтээҕи киин бибилэтиэкэ дириэктэрэ:
—2013 сылтан бибилэтиэкэбитигэр эбии дьиэ тутуллан быйыл үлэҕэ киирдэ. Онтубут мультимедийнай саалалаах. Бибилэтиэкэ үлэтигэр олоҕун анаабыт Ольга Федорова кыраайы үөрэтэр отделга сэбиэдиссэйдиир кэмигэр элбэх докумуон уонна элбэх кинигэ электроннай базаҕа киллэриллибиттэрэ. Ону таһынан, улууспут историятын сырдатар элбэх видео, аудио кассеталар оцифровкаламмыттара. Хас сыл аайы филиал үлэһиттэригэр электроннай слайдалары оҥорууга араас күрэхтэһиилэр ыытылланнар, саҥа аһыллыахтаах саалаҕа баай матырыйаал бэлэмнэммитэ. Итини барытын бу саалаҕа көрөр кыахтаннылар. Саамай улахан ситиһиибитинэн, улуустааҕы “Үөһээ Бүлүү” хаһыат 1943 сылтан барыта электроннай версиялара оҥоһуллубута буолар. Билигин ааҕааччылар аны быыллаах хаһыаты хаспакка, көмпүүтэргэ киирэн көрөн, наадалаах информацияларын бэчээттээн таһаарар толору кыахтаннылар. Дьокуускайдааҕы Национальнай бибилэтиэкэни кытта өрөспүүбүлүкэ үрдүнэн корпоративнай электроннай каталогы оҥорууга үлэлэһэбит.