Бэҕэһээ «НТВ» ханаалга норуоттар икки ардыларынааҕы “Ты — супер” бырайыак биир улахан суолталаах түһүмэҕэ буолла. Дьүүллүүр сүбэ чилиэннэрэ бары күөх уоту баттаабыттарын үрдүнэн, 8 бастыҥтан биһиги оҕолорбут түөрт иһигэр киирбэтилэр, күрэхтэн туораатылар. Ол да буоллар, “Хатан” ансаамбыл Кириэмилгэ финалистар гала-кэнсиэртэригэр кыттарга путевка тутта.
Татьяна Маркова, «Саха сирэ» хаһыат, edersaas.ru
Ити туһунан биһиэхэ Үөһээ Бүлүүтээҕи детдом дириэктэрэ Петр Бубякин иһитиннэрдэ:
— Биһиги сибээһи тута олоробут. Түүн 3:00 чааска ансаамбыл салайааччыта Роман Кысылбаиков төлөпүөннээтэ. Түмүктүүр түһүмэх гала-кэнсиэрэ ыам ыйын 26 күнүгэр Кириэмилгэ буолар, онно биһиги оҕолорбут кыттар буолбуттара үөрүүлээх. Маны таһынан, кулун тутар 25 күнүгэр солист Володя Климовскай Кыайыы күнүгэр аналлаах килиипкэ уһуллуоҕа. Онон, бу ый 25 чыыһылатын кэнниттэн бары бииргэ ахтылҕаннаах дойдуларыгар, дьиэлэригэр кэлэргэ былаанныыллар. Онтон гала-кэнсиэркэ кытта ыам ыйыгар эмиэ Москвалыахтара. Айаннарын барытын «НТВ» ханаал төлүүр.
Ансаамбыл бу сырыыга Виктор Цой репертуарыттан ыллаата. Онуоха, “Машина времени” бөлөх чилиэнэ тахсан олус хайҕаабыт: “Биһиги эдэрбитин санаттыгыт. Ол эрээри эһиги сааскытыгар биһиги быдан мөлтөх этибит. Эһиги олус маладьыастаргыт!”, — диэбит. Госдуума дьокутаата, биир дойдулаахпыт Федот Тумусов кэлэн истиҥник эҕэрдэлээбитигэр оҕолор эмиэ соһуйа үөрбүттэр. Кини оҕолорго Махтал суруктары туттарбыт.
«Роман Гаврильевичтыын күн иккис аҥаарыгар эмиэ сибээскэ тахсыахтаахпыт, туох сонуннаахтарын истиэхпит«, — диир Петр Николаевич.
ЫСПЫРААПКА
“Ты супер” – бу норуоттар икки ардыларынааҕы бырайыак. Барыта 11 араас дойдуттан, уопсайа, 1500 оҕо кыттыбытыттан “хатаннар” 20 иһигэр бэрт кыранан киирбэтилэр. Онон, бачча улахан куонкуруска үчүгэйдик кыттыбыттара, Саха сирин аатын ааттаппыттара оҕолорго улахан ситиһии. “Хатаннары” эҕэрдэлиибит!
Татьяна Маркова, «Саха сирэ» хаһыат, edersaas.ru