close
«Его дочь» драма, биография киинэни көрүҥ!
· - Бу - интэриэһинэй - ЭС - маны аах

«Его дочь» драма, биография киинэни көрүҥ!

 

Аан дойду киинэ тыйаатырдарыгар араас ис хоһоонноох, таһымнаах  киинэлэр күннэтэ дьон көрүүтүгэр тахсаллар. Ону кытта саха киинэтэ эмиэ сайдар. Ордук чуолаан комедияны, драманы баһыйа тутар буоллубут.

edersaas.ru


Бу соторутааҕыта Саха сирин киинэ тыйаатырдарыгар «Кини кыыһа» диэн сэттэ сыл анараа өттүгэр уһуллубут, улахан киинэ бэстибээллэригэр ситиһиилэммит уус-уран киинэ таҕыста. Бу киинэ суолтата режиссер Татьяна ЭВЕРСТОВА эбээ, эһээ тапталларыгар уйдаран оҕо сааһын эргитэн ойуулааһына көстөр. Оҕо хараҕынан тулалаан турар айылҕа, чугас дьонун сыһыана, олоххо харыстабыллаахтык сыһыан уонна оҕону сахалыы сиэринэн иитии түгэннэрэ дьон болҕомтотун тардар. Элбэх тыла-өһө суох өйдөнөр киинэни сахабын дэнээччи киһи барыта көрүөхтээх дии саныыбын. Манна биһиги бары олорон кэлбит олохпут чаҕылыччы көстөрө уонна кыра кыыс оҕо Аҕа айыылааҕа, билигин орто омурҕаныгар сылдьар дьахтар оҕо кэмин ахтара барыбытыгар да чугас курдук. Киһи сааһыран истэҕин ахсын оҕо сааһа ордук кэрэтийэн уонна санааҕа ыраастык, истиҥник киирэрэ үксээн иһэр, ол да иһин бу өйүгэр хатаабыт, сыттыын-дьүһүннүүн маннык этэ диэн аҥардас оҕо биир сайынын үчүгэйдик да көрдөрдө. Татьяна Эверстова киинэлэрэ саха буоларгын билиннэрэр уонна сиэргэ-майгыга үөрэтэр-иитэр, төрөөбүт дойдуну, айылҕаны таптыырга, харыстыырга аналлаахтар эбит, ити эһэлээх эбэтэ биэрбит үөрэхтэриттэн ситимнээҕэ көһүннэ.

Бу киинэҕэ сунтаардар киэн туттар киһибит Прокопий ЯКОВЛЕВ  оонньообута өссө ордук чугас буолла. Бу киинэҕэ Борокуоппайы алта уонча киһиттэн талан эһээ оруолун оонньоппуттар эбит. Маннык улахан ааттаах киинэҕэ күндү киһибит үйэтитиллэн хаалбыта киэн туттуу!

Күндү киинэни көрөөччүлэр, саха киинэтигэр сүгүрүйээччилэр хайаан да саха оҕотун, кини ыраас санаатын, тулалыыр эйгэ кэрэтин кэпсиир киинэни көрүҥ! Маны көрөргүтүгэр уруккуну эргитэн, ааспыт кэрэ кэммитин ойуулаан көрөрдүү уонна саха олоҕун суолтатын хас биирдии тылга, хамсаныыга өйдүүрдүү бэлэмник барыҥ!

Түмүккэ, Сунтаарбыт улахан артыыһыгар Прокопий ЯКОВЛЕВКА итии-истиҥ эҕэрдэ уонна махтал Эйиэхэ дойдуҥ аатын ааттатаргар!

Мария КОБЕЛЬЯНОВА — ТУСКУЛААНА, Сунтаар, «Эдэр саас» сайтка анаан.

3
0

Сайт матырыйаалларын ааптар көҥүлэ суох ылар бобуллар.
Facebook
Facebook
Instagram
GOOGLE
http://edersaas.ru/ego-doch-drama-biografiya-kiineni-k-r/

INSTAGRAM ЛИЭНТЭТЭ

Instagram батыһан бар