Ил Дархан Егор Борисов Санкт-Петербург губернаторын Георгий Полтавченконы кытары көрсөн экономика боппуруостарын ырытта, эһиилги былааннарын кэпсэттэ. edersaas.ru.
Биэс сыллааҕыта Егор Борисов Санкт-Петербуру кытары атыыга-эргиэҥҥэ, научнай-техническэй хайысхаҕа, социальнай, култуура эйгэлэригэр бииргэ үлэлэһэргэ дуогабар түһэрсибитэ. Бу дуогабар чэрчитинэн, иллэрээ сыл 2016-2018 сс. үлэлииргэ былаан ылыммыттара.
Георгий Сергеевич бэлиэтииринэн, кэлиҥҥи сылларга эргиэн, экономика өттүгэр үлэ тэтимирэн, түмүк номнуо көстөн эрэр. Холобур, былырыын 2015 с. сылы кытары тэҥнээтэххэ, атыы-эргиэн эргимтэтэ үс төгүл улааппыт. Экономикаҕа да ити курдук кэккэ ситиһиилэрдээхпитин этэн туран, Георгий Полтавченко, бастакытынан, суудуна оҥоруутугар этиилэри киллэрдэ. Биллэрин курдук, Санкт-Петербург муора, өрүс суудуналарын оҥоруунан дьарыктанар улахан киин сир. Ол эрээри биһиэхэ бэйэбитигэр Жатайга сотору кэминэн улахан собуот тутуллуохтаах. Бу собуот Арктикаҕа, хоту дойдуга тэриллибит тирэх зоналар сайдар бырагыраамаларыгар киирсибитэ. Былаан быһыытынан, манна араас суудунаны оҥорон таһаарыахтаахтар.
Иккиһинэн, Саха сиригэр эми-тому тириэрдиигэ үлэлэһиэххэ сөбүн эттэ. Билигин Санкт-Петербург бу хайысхатын 20 % сылын аайы улаатыннаран иһэр. Онон олохтоох эминэн-томунан хааччыллан олороллор.
Олохтоох салайыныыга туһаайан эттэххэ, Санкт-Петербург регионун кытары муниципальнай таһымҥа баһылыктар эмиэ хардарыта үлэлэһэллэр. Быйыл Жатай Адмиралтейскай оройуону кытары бииргэ үлэлэһэргэ дуогабарга илии баттаста.
Ил Дархан Егор Борисов Санкт-Петербург уонна Саха сирэ бииргэ үлэлээһиннэрэ дириҥ силистээҕин, манна сыылкаҕа кэлэ сылдьыбыт декабристар, политсыылынайдар, үөрэхтээх дьон, кэлин Петербурга кэлэн үөрэммит геологтар, горняктар ылар оруоллара улаханын бэлиэтээтэ. Уонна билигин Петербург Саха сирэ сайдыытыгар эмиэ биир биллэр-көстөр сири ыларын эттэ. Аҥаардас Санкт-Петербурдааҕы экономическэй форумҥа кыттарбыт да элбэҕи этэр. Бу былаһаакка аан дойдуга тахсар ааммыт буолар эбээт.
Аграфена КУЗЬМИНА, “Саха сирэ” хаһыат, edersaas.ru.