Егор Борисов: “Тахсыбыт быһыыга авиахампаанньа экипаһыгар сыанабыл бэриллиэҕэ»
Бүгүн интэриниэт ситимигэр Ил Дархан Егор Борисов «Аэрофлот» авиахампаанньа үлэһиттэрин кытары сөпсөспөтөҕүн туһунан сурах тарҕанна. Бу туһунан Егор Афанасьевич инстаграм аккаунугар быһааран суруйда.
edersaas.ru
«Бүгүн «Аэрофлот» авиахампаанньа сөмөлүөтүгэр буолбут быһыы-майгы туһунан сурах тарҕанна. Ити төрүөтүнэн аэропорт үлэһиттэрэ регистрация кэнниттэн биһиги посадочнай толуоммутун умнан кэбиһэн, хойутатан биэрбиттэрэ буолар. Ити кэмҥэ стюардесса араллааны таһаарда, туох да төрүөтэ суох көмөлөһөөччүбүн рейстэн устан кэбистэ. Бу авиахампаанньа бортпроводниктарын өттүлэриттэн Саха сирин пассажирдарыгар маннык хаҕыстык сыһыаннаһаллара эрдэ да тахсыталыыр этэ. Онон өрөспүүбүлүкэ бырабыыталыстыбатын аппаратыгар бу тахсыбыт түгэҥҥэ сөптөөх юридическэй сыанабылы биэрэллэригэр эттим», — диэн этэр Егор Борисов.
Егор Борисов Москваҕа Госдуума дьокутаата Галина Данчикованы, Саха сирин РФ бэрэсидьиэнигэр бэрэстэбиитэлистибэтин, Москваҕа үөрэнэр эдэр аспираннары кытары көрсүбүтэ.
Аграфена КУЗЬМИНА, «Саха сирэ» хаһыат, edersaas.ru