Ил Дархан Егор Борисов Аҕа дойду сэриитин кыттыылаахтарын, тыыл бэтэрээннэрин, сэрии оҕолорун эҕэрдэлээн туран, Кыайыы күнэ биһиэхэ барыбытыгар ураты тыыны иҥэрэрин, кэм-кэрдии аастаҕын аайы суолтата өссө үрдээн иһэрин бэлиэтээн эттэ.
Аграфена КУЗЬМИНА, “Саха сирэ” хаһыат, edersaas.ru
“Биһиги бүгүн дойду үрдүнэн ураты суолталаах бырааһынньыгы бэлиэтиибит. 72 сыл анараа өттүгэр Берлин куоракка Гитлер армиятын самнаран, биһиги хорсун-хоодуот буойуннарбыт Улуу Кыайыыны уһансыбыттара. Уоттаах сэрии кэмигэр барыта 35 мөлүйүөнтэн тахса киһи фроҥҥа ыҥырыллан саа-саадах тутан, дойдуларын көмүскүү тахсыбыта. Кинилэртэн 27 мөлүйүөн киһи дойдуларыгар төннүбэтэхтэрэ, кыайыы иһин сырдык тыыннарын толук уурбуттара”, — диэн бэлиэтиир Егор Афанасьевич.
Саха сириттэн эмиэ үгүс киһи сэриигэ ыҥырыллан барбыта. Өскөтүн 60 тыһыынчаттан тахса киһи сэриигэ барбыт буоллаҕына, аҥаардара кыргыһыы хонуутугар охтубута, дойдуларын мүөттээх сытын, Кыайыы өрөгөйүн билбэтэҕэ.
“Бүгүн биһиги Улуу Кыайыы иһин тыыннарын толук уурбут уонна кыргыһыы хонуутуттан тыыннаах эргиллэн кэлэн дойдубутун сайыннарыыга ылсыбыт хорсун буойуннарбытыгар сүгүрүйэн сибэкки дьөрбөтүн уурабыт, ааттарын ааттаан кинилэри ахтан-санаан ааһабыт. Хас биирдии буойун төрөөбүт дойдуга таптал, бэриниилээх буолуу, дойду туһугар эппиэтинэс үрдүк чыпчаалын көрдөрөр. Ол курдук, снайпердар Федор Охлопков, Иван Кульбертинов, Дмитрий Гуляев, танкист Михаил Космачев, сапер Георгий Шавкунов, пехотинецтар Клавдий Краснояров, Владимир Лонгинов, Федор Попов, о.д.а. Саха сирин аатын ааттаппыттара, биһиэхэ холобур буолаллар”, — диэн Егор Борисов ыччакка туһаайан этэр.
Аҕа көлүөнэ ил, эйэ туһугар охсуспута, баҕа санаата туолан, билигин биһиги эйэлээх олоххо олоробут. Ол туһугар кинилэргэ махтаныах уонна кинилэр ааттарын өрүү саныы, ахта сылдьыах тустаахпыт. “Улуу Кыайыы биһигини өссө үрдүк ситиһиигэ кынаттыыр уонна бииргэ түмэр”, — диэн түмүккэ Ил Дархан Кыайыы болуоссатыгар мустан турар дьоҥҥо иһитиннэрэр.
Аграфена КУЗЬМИНА, “Саха сирэ” хаһыат, edersaas.ru