Егор Борисов Нерюнгригэ хаарбах дьиэттэн дьону көһөрүү бырагырааматын үлэтин билистэ

Бөлөххө киир:

Ил Дархан Егор Борисов бэҕэһээ Нерюнгри оройуонугар оробуочай сырыытын кэмигэр Нерюнгри куорат «Чараҥ» микро-оройуонугар, Чульман уонна Серебряный Бор бөһүөлэктэргэ хаарбах дьиэттэн дьону көһөрүү бырагырааматынан тутулла турар дьиэлэри көрдө.

Александр ТАРАСОВ, «Саха сирэ» хаһыат, https://edersaas.ru
Чульмаҥҥа Егор Афанасьевич «Альянс» уонна «Орион-строй+» хампаанньалар тутар элбэх кыбартыыралаах дьиэлэригэр сылдьан, тутааччылары кытта көрүстэ. Төһө хаачыстыбалаахтык тута сылдьалларын, тутуу матырыйаала баарын-суоҕун уонна тиийэрин туһунан ыйаталаста. Бэдэрээтчиттэр тутуу матырыйаалынан толору хааччыллыбыттарын, тута сылдьар дьиэлэрин кэмигэр үлэҕэ киллэрэллэрин эттилэр.
Егор Борисов Нерюнгригэ сылдьар кэмигэр бу анал бырагырааманан тутулла турар дьиэлэри көрбүтэ мээнэҕэ буолбатах. Тоҕо диэтэххэ, Нерюнгри оройуона бырагырааманы олоххо киллэриигэ, атын улуустары кытта тэҥнээтэххэ, көрдөрүүтэ быдан мөлтөх. Бүтэһик иһэр. Бырагыраама чэрчитинэн, бу оройуоҥҥа саамай элбэх саҥа дьиэ тутуллан үлэҕэ киириэхтээх. Ол курдук, 2013-2017 сылларга 491 тыһ. кв м иэннээх дьиэ тутуллуохтаах буоллаҕына, 171 тыһыынчата Нерюнгри оройуонугар баар.

«Дойду президенэ Владимир Путин соторутааҕыта хаарбах дьиэттэн дьону көһөрүү бырагыраамата 2018 сыл тохсунньу 1 күнүттэн салгыы үлэлиэ диэн иһитиннэрбитэ. Өрөспүүбүлyкэ бу бырагырааманы 2018 сылтан салгыы үлэлэтиэҕэ», – диэн Егор Афанасьевич Чульмаҥҥа саҥа дьиэҕэ киирбит Черепиннэр дьиэ кэргэттэригэр кэпсээтэ.

Серебряный Бор бөһүөлэккэ билиҥҥи туругунан 20 дьиэ тутулла турар. Кыраапыктан хаалыы баар. Бөһүөлэк дьаһалтата этэринэн, 2015 сыллааҕы түһүмэх (11 дьиэ) тутуута 90 % үбүлэммит буоллаҕына, 2016 сыллааҕыга (9 дьиэ) 30 %-на эрэ көрүллүбүт. Онон 2017 сыл балаҕан ыйын 1 күнүгэр диэри бэдэрээтчиттэр алта дьиэни үлэҕэ киллэрэр туруктара суох. Егор Борисов күһүн буоларын кэтэспэккэ, бүгүҥҥү балаһыанньа туругунан борокуратуура кыттаһарын туһунан эттэ.
Нерюнгригэ тустаах бырагырааманы олоххо киллэриигэ үс ньыма туһаныллар: саҥа дьиэни тутуу, иккис ырыынактан кыбартыыраны атыылаһыы уонна гражданнарга харчынан боруостааһын. Үс ньыма баарын үрдүнэн бырагырааманы олоххо киллэрии бытаана өйдөммөт. Борокуратуура ороостоҕуна, туга-ханныга чуолкай биллиэҕэ.

+1
0
+1
0
+1
0
+1
0
+1
0
+1
0
+1
0