Бүгүн РФ бырабыыталыстыбатын вице-премьерэ Юрий Трутнев Мирнэйгэ сырыытын кэмигэр Ил Дархан Егор Борисов “Мир” рудник саахалыгар сураҕа суох сүппүт аҕыс шахтер чугас дьонун кытары көрүстэ. Кинилэргэ анаан өрөспүүбүлүкэ салалтата уонна “АЛРОСА” хампаанньа көмөнү оҥорорго бэлэм. edersaas.ru
Санатан эттэххэ, билигин да шахтаттан аҕыс киһини таһаара иликтэр. Бу аҕыс киһиттэн түөрдэ – Саха сирин олохтоохторо. Саахал тахсаатын кытта “АЛРОСА” бу сүппүт шахтердар чугас дьоннорун кытары билсэн, Мирнэйгэ кэлэллэрин хааччыйбыта.
Кинилэр Егор Борисовы, Юрий Трутневы кытары көрсүһүүгэ биир үксүн көрдөөһүн төһө өр ыытыллыаҕын, шахтаҕа туох быһыы-майгы буола турарын ыйыталастылар. “Шахтаҕа хаалбыт аҕыс киһи аймахтарын, чугас дьонун кытары көрүстүбүт. Көрдөөһүн үлэтэ төһө көдьүүстээхтик баран иһэрин, төһө өр салҕанан барыаҕын, дьон баар сиригэр хаһан тиийиэхтэрин ыйыталаһаллар”, — диэн бэлиэтиир көрсүһүү кэнниттэн Юрий Петрович.
Манна даҕатан эттэххэ, саахал тахсаатын кытта Мирнэйгэ ыксаллаах-быһыы майгы биллэриллибитэ. Биллэрин курдук, Мирнэй – биир улахан хампаанньа тула сайдар монокуорат буолар. Онон бу хампаанньа үлэтиттэн-хамнаһыттан куорат социальнай олоҕо-дьаһаҕа быһаччы тутулуктанар. Өрөспүүбүлүкэ салалтата уонна хампаанньа эмсэҕэлээбиттэргэ көмөнү оҥорорго бэлэм. “Хампаанньаны кытары сүбэлэһэн баран, үлэһиттэргэ көмө оҥорорго быһаарыммыппыт. Саахалга эмсэҕэлээбит дьоҥҥо көмө көрүллүбүтэ. Онон бу чааһыгар боппуруос үөскээбэт. Билигин сүрүн болҕомтобутун дьону быыһааһын, шахтаттан таһаарыы үлэтигэр хатаан олоробут. Бу саахал түмүгүнэн, биһиги атын улахан хампаанньаларбыт хайдах, туох үлэлииллэрин көрүөхпүтүн, бэрэбиэркэлиэхпитин баҕарабыт”, — диэн этэр суруналыыстары кытары көрсүһүүгэ. edersaas.ru
Аграфена КУЗЬМИНА, edersaas.ru