Егор Борисов Монголия бэрэсидьиэнин кытта «Азия оҕолоро” оонньуулары тэрийиини дьүүллэстэ
Владивосток куоракка, Илиҥҥи экэниэмикэ пуорумун кэмигэр Саха Өрөспүүбүлүкэтин Ил Дархана Егор Борисов Монголия бэрэсидьиэнэ Халтмаагийн Баттулганы кытта көрсөн кэпсэттэ. Кэпсэтии биир сүрүн тиэмэтинэн 2020 сылга Улаан Баатарга VII «Азия оҕолоро” оонньуулары тэрийэн ыытыы буолла. Бу туһунан Егор Борисов тус сайта иһитиннэрэр. edersaas.ru
Егор Борисов Халтмаагийн Баттулганы бу сайын үрдүк дуоһунаска талыллыбытынан эҕэрдэлээтэ, Монголия уонна Саха сирэ уһун сыллар усталарыгар спорт, физическай култуура эйгэтигэр көдьүүстээх бииргэ үлэлииллэрин, монголлар “Азия оҕолоро” оонньууларга куруутун кытталларын бэлиэтээтэ.
“Азия оҕолоро” норуоттар икки ардыларынааҕы спортивнай оонньуулар Саха сиригэр төрүттэммиттэрин, ЮНЕСКО уонна аан дойдутааҕы олимпийскай кэмитиэт өйөөһүннэринэн ыытыллалларын ыйан туран, Егор Борисов Оонньуулар сайдыыларыгар өрөспүүбүлүкэ интэриэстээҕин эттэ.
Халтмаагийн Баттулга “Азия оҕолорун” бырагырааматыгар киирбит спорт көрүҥнэринэн дьарыктанарга Монголияҕа бары усулуобуйа тэриллэрин кэпсээтэ, мантан антах физкультура уруоктарыгар үөрэтиллэр буолуохтара диэтэ. VII “Азия оҕолоро” оонньууларга кыттыахтаах хамаанданы сүүмэрдиир инниттэн 2019 сылтан бүттүүн Монголиятааҕы үөрэнээччилэр күрэхтэһиилэрэ ыытыллыахтара.
Роман Попов, “Саха сирэ” хаһыат, edersaas.ru