Ыам ыйын бүтүүтэ Өймөкөөн улууһугар Томтор уонна Сордоҥноох нэһилиэгин икки ардынааҕы муоста кытыла сиҥнибитэ. Өксөкүлээх Өлөксөй 140 сылын бэлиэтиир ыһыаҕар Томторго барар сылдьан, массыына булан Куйдуһун өрүһү анаан-минээн тиийэн көрдүм.
Прокопий БУБЯКИН, https://edersaas.ru
Былаастар бэс ыйын 10 диэри оҥоһулларын ситиһиэх буолбут этилэр да, бүгүн 30 чыыһыла буолла — сиҥниитэ өссө улаатта.
Муостаҕа тиийэн Афанасий Винокуровы, Сордоҥноох нэһилиэгин олохтооҕун, көрүстүм. Коммунальнай хаһаайыстыбатын сантехнигынан үлэлиир Афанасий Петрович сордоҥноохтор улаханнык эрэйдэнэллэрин кэпсээтэ. Холобур, бу Томторго ыһыахтыы кэлбит дьон муостаҕа диэри биир массыынан кэлбиттэр, үтэһэлэрин, кымыстарын, малларын-салларын туппутунан далаһа нөҥүө хааман туораан атын, көрсөргө болдьоспут массыыналарыгар олорон салгыы айанныыллар. Сатыы дьон Куйдуһуну нөҥүө сылдьалларыгар баһыыба, табаар тиэйэр улахан массыына туһунан эрэ да барыллыбат.
Исписэлиис буолбатах да киһи көрөр: өрүс сүнньэ уруккуттан уларыйбыта сиҥнии төрүөтэ буолбут. Сүүрүк туох баар күүһүнэн Томтор өттүнээҕи буор кытылы охсо турар. Суурайымына. Өссө кэҥэтэн иһиэ. Сордоҥноох олохтооҕо Варвара Тимофеевна Иванова эппитинэн, сыл аайы от ыйынааҕы ардахтар бу эҥэр олус улахан ууну аҕалар эбиттэр. Онон, Куйдуһун өрүс уута сайыны быһа улахан туруон сөп. Ханнык да үлэни ыыппатахха, мин көрдөхпүнэ, сотору кэминэн уу бу кытылы тоҕо охсон, Томтор сэлиэнньэтин «Куйдуһун» микрооройуонугар баар бензин саппараапкатын ылыыһы.
«Суолу оҥорооччулар саас өрүһү ортотунан хорутан биэрбиттэрэ буоллар, уу ону бэйэтэ дириҥэтэн, онон суолланыа этэ» — диэн Афанасий санаата түһэн кэпсиир.
«Саха сирэ» хаһыат бу муоста өрөмүөннэниитин кэтээн көрүөҕэ.
Прокопий БУБЯКИН, https://edersaas.ru[vc_video link=»https://www.youtube.com/watch?v=Z03N5nVbwCE&feature=youtu.be» title=»ВИДЕО»][vc_video link=»https://www.youtube.com/watch?v=h2X7-LInXy0&feature=youtu.be» title=»ВИДЕО»]