Мунньуунан үлүһүйэр дьикти дьарыктаахтары тиһигин быспакка сырдатабыт. Бу сырыыга Өймөкөөн улууһун Сордоҥноох нэһилиэгин олохтооҕо, норуот маастара Екатерина Григорьевна Таркованы кытта билсиҥ. Сэһэргээччибит Индигир өрүс таастарын мунньар. edersaas.ru
«Оҕо сылдьан ыстаадаҕа куруук өрүс тааһынан оонньуур буоларбыт. Онно сылдьан араас дьүһүннээх, быһыылаах таастар баалларын олус сонургуу көрөрүм, мунньан испитим. Кэлин бөһүөлэккэ көһөн киирэрбит саҕана ыстаадаҕа үлэлээбитим, олорбутум туһунан өйдөбүл буолан хааллыннар диэн муспут таастарбын илдьэ кэлбитим. Анаан-минээн хаама сылдьан көрдөөбөппүн, ардыгар оҕолорум, сиэннэрим булан аҕалааччылар. Олор быыстарыгар кыыллар төбөлөрүн быһыытыгар майгынныыр, төп-төгүрүк, түөрт муннук, киһи сирэйин, хараҕын курдук, лапчаан, сыыппара, буукуба ойуулаах уо.д.а. киһи интэриэһиргии көрөр таастара дэлэйдэр. Археологическай суолталаах былыргы дьон туттубут төгүрүк тааһа үгүс дьон болҕомтотун тардааччы. Коллекциям ахсаанын ааҕа иликпин, элбэҕэ бэрт. Анал мас дьааһыктарга араартаан уурталыыбын, ардыгар иллэҥсийдэхпинэ бэрийээччибин. Дьөлөҕөстөөх тааһы дьол тааһа диэччилэр. Бу маннык таас эмиэ дэлэй, анаан көрдөөбөппүн, бэйэтэ көстөр. Сордоҥнооххо кэлбит ыалдьыттар, туристар куруук сылдьан ааһаллар, үлүһүйүүм туһунан элбэхтэ видеоҕа устубуттара. Өрөспүүбүлүкэтээҕи, улууспут иһинээҕи быыстапкаларга куруук кыттабын», — диэн Екатерина Григорьевна кэпсиир.
Екатерина Григорьевна тоҕус оҕолоох — биэс кыыс, түөрт уол оҕо күн күбэй ийэтэ буоларыттан күннэтэ дьоллонор. Кини ахсыс кылаас кэнниттэн кадровай булчут буолбут, тииҥҥэ бултаспыт, ыстаадаҕа, маҕаһыыҥҥа үлэлээбит. Ыстаадаттан оҕолорун үөрэттэрээри бөһүөлэккэ көһөн кэлбит. Аны быйыл иискэ норуот маастара буолбут. Кини иистэнэрин, таас мунньарын таһынан кус түүтүнэн, сэбирдэҕинэн көрүөхтэн эриэккэс араас хартыыналары оҥорор, былыргы эҕэрдэ аккырыыккалары, мааркалары мунньар эбит.
Сэһэргээччибит иккис кыыһа Алена ийэтин туйаҕын хатаран, кыраҕы харахтаах булчут эбит. “Саабын кыбынным даҕаны бэйэм киэнэ, айылҕаҕа сылдьарбын, сынньанарбын наһаа сөбүлүүбүн. Быйыл дьүөгэбиниин биир түүн иһигэр икки сүүс куһу бултаан турардаахпыт. Убайым оҕо эрдэхпиттэн тыаҕа илдьэ сылдьааччы, саа хайдах эстэрин, иитиллэрин көрдөрөн биэрэр этэ. Ону олус интэриэһиргиирим. Куска булт көҥүллэнэрин туохтааҕар даҕаны күүтэбин”, — диэн Алена кэпсиир.
Мантан да атын арааһынайы мунньар дьон элбэхтэр. Киһи баҕардаҕына хаһан баҕарар, тугу баҕарар мунньан саҕалыан сөп. Оттон эн тугу мунньаҕын? Дьарыгыҥ туһунан дьоҥҥо кэпсиэххин, биир дьарыктаахтаргын кытта билсиэххин баҕарар буоллаххына, коллекцияҕын хаартыскаҕа түһэрэн, кылгастык кэпсээн, төлөпүөнүҥ нүөмэрин ыйан туран, edersaas@mail.ru электроннай аадырыска ыыт.
Айтана АММОСОВА, edersaas.ru