Бүгүн, муус устар 5 күнүгэр, сарсыарда 10 чаастан Хотугулуу-Илиҥҥи федеральнай университет “Сэргэлээх уоттара” култуура киинигэр Айылҕа харыстабылын министиэристибэтин тэрээһининэн өрөспүүбүлүкэ экологтарын иккис сийиэһэ үлэтин саҕалыа. Быйыл дойду үрдүнэн биллэриллибит Экология сылыгар ийэ айылҕабытын араҥаччылааччылары үгүс түбүктээх үлэ күүтэр.
Бу улахан дьаһалга экологтар эрэ буолбакка, наука үлэһиттэрэ уонна уопсастыбаннас бэрэстэбиитэллэрэ көхтөөхтүк кыттыахтара. Тэрээһин сийиэһинэн муҥурдаммат: норуот хаһаайыстыбатын салааларынан дискуссионнай сессиялар ыытыллыахтара. Бүгүн киэһэ университет Учуонай сэбиэтин саалатыгар Саха Өрөспүүбүлүкэтэ айылҕа харыстабылын исписэлиистэрин бэлэмнээн таһаарбыта 25 сылыгар аналлаах үөрүүлээх мунньах буолуоҕа.
Муус устар 6 күнүгэр “Сэргэлээх уоттара” култуура киинигэр Саха сирин биологическай ис кыаҕар туһуламмыт научнай-практическай кэмпириэнсийэ тэриллиэ. Манна таарыйа Саха сирин биоресурсаларын туһаныы технологияларын көрдөрөр быыстапка-дьаарбаҥка арыллыа. Кэмпириэнсийэ балтараа чаастаах пленарнай мунньах кэнниттэн сарсыарда өттүгэр секцияларынан, дискуссионнай сессияларынан ыытыллан баран, күнүскү чэйтэн киэһэ бырабыыталыстыба 2-с №-дээх дьиэтигэр көһөн үлэлиэ.
Үһүс күҥҥэ сессиялар, секциялар, консультациялар салгыы ыытыллыахтара. Научнай-практическай кэмпириэнсийэ үлэтин түмүктээбитин кэнниттэн, Бэчээт дьиэтигэр Өрөспүүбүлүкэтээҕи пресс-кииҥҥэ пресс-кэмпириэнсийэ тэриллэрэ күүтүллэр. Ити күн күнүс 3 чаастан Опера уонна балет тыйаатырыгар экологтар иккис сийиэстэрин үлэтин түмүктүөхтэрэ итиэннэ “Айылҕа уонна биһиги” диэн айылҕа харыстабылын акциятын арыйыахтара.
Василий НИКИФОРОВ, edersaas.ru, «Саха сирэ» хаһыат.