Атырдьах ыйын 30 күнүгэр Бырабыыталыстыба бэрэссэдээтэлэ Евгений Чекиҥҥэ тэриллибит мунньахха Экономика сэбиэтэ «Теплоэнергия» МУТ 2017-2022 сс. инвестбырагыраамата көрүлүннэ.
«Теплоэнергия» муниципальнай-унитарнай тэрилтэ дириэктэрэ Максим Трофимов иһитиннэрбитинэн, хаһаайыстыба күн бүгүн 43 хочуолунайдаах, 803 тыһ. 665 кв. миэтэрэ иэннээх олорор дьиэни-уоту, 4 тыһ. 184 эбийиэги сылааһынан хааччыйар. Билиҥҥи туругунан, сылааһы учуоттуур прибордар 170 эбийиэккэ туруоруллубуттар. Кэлиҥҥи биэс сыл устата МУТ икки саҥа хочуолунайы үлэҕэ киллэрбит, сэттэ хочуолунайы саппыт, бэйэтин балаансатыгар 16 хочуолунайы уонна 35,9 км усталаах ситими ылбыт. Тэрилтэ 751 үлэһиттээх, абоненнарын ахсаана 13 тыһ. 866 киһиэхэ тиийбит.
Биллэрин курдук, 1980-1990 сылларга тутуллубут элбэх кыбартыыралаах дьиэлэри сылааһынан кыбаарталлааҕы хочуолунайдар кииннээн хааччыйаллара. Ол хочуолунайдар бастаан тус-туһунан биэдэмистибэлэр көрүүлэригэр-истиилэригэр сылдьыбыттара, кэлин куорат дьаһалтатыгар бэриллибиттэрэ. Ол түмүгэр, «Теплоэнергия» МУТ билигин хочуолунайын ахсаанынан куоракка бастакы миэстэни ылар. Тэрилтэ 2017-2022 сс. инвестбырагырааматын быһыытынан, 16 саҥа саҥа эбийиэк тутуллуохтаах, сылааһынан хааччыйар ситим биэс эбийиэгэ уонна аҕыс хочуолунай саҥардыллыахтаахтар, 24 эбийиэк энергияны кэмчилээһин технологиятыгар киллэриллиэхтээх.
Инвестбырагырааманы олоххо киллэрии көдьүүстээх түмүктэниэҕэр Максим Трофимов эрэнэр. Бастатан туран, сылааһынан хааччыйыы хаачыстыбата тупсарыллар, быдан эрэллээх буолар итиэннэ тарыып үрдээһинэ хонтуоруолланар эбит. Иккиһинэн, «Теплоэнергия» ситимигэр холбонуу технологията судургутуйуута саҥа тутуллар дьиэлэргэ кыбартыыра бэйэҕэ турар сыанатын намтатар кыаҕы үөскэтэр. Ону таһынан хомунаалынай хаһаайыстыбалар ситэ ылбатах дохуоттарын толуйууга өрөспүүбүлүкэ бүддьүөтүттэн көрүллэр үп кээмэйэ аччатыллар. Оттон хаһаайыстыба базатын аныгы технологиянан саҥардар, бөҕөргөтөр, элбэх туһанааччыны холбонор.
Дакылааты истэн баран, Евгений Чекин Саха сирин курдук уһун, тымныы кыһыннаах дойдуга хомунаалынай өҥө үчүгэй хаачыстыбалаах буолара ирдэнэрин уонна олох таһымын көрдөрөрүн бэлиэтээтэ. Өрөспүүбүлүкэ 2030 сылга диэри социальнай-экономическай сайдыытын Стратегиятыгар экономика араас салааларынан ыытыллар үлэ-хамнас барыта нэһилиэнньэ олоҕун тупсарыыга ананарын, онон, өрөспүүбүлүкэ сайдыытыгар дьоһун суолталаах инвестбырагыраамалар, бырайыактар болҕомтоҕо ылыллалларын эттэ.
—— Хас биирдии тэрилтэ, хаһаайыстыба үлэтигэр-хамнаһыгар киһи, өрөспүүбүлүкэ олохтооҕун интэриэһэ чорботуллуохтаах, нэһилиэнньэ олоҕо-дьаһаҕа тупсаҕай, үчүгэй хааччыллыылаах буоларыгар туһаайыллыахтаах, — диэн түмүктээтэ этиитин Евгений Чекин.
Бырабыыталыстыба иһинэн тэриллибит Экономика сэбиэтин чилиэннэрэ ыйытыы, санаа атастаһыытын кэнниттэн «Теплоэнергия» МУТ 2017-2022 сс. инвестбырагырааматын өйөөтүлэр.
Раиса СИБИРЯКОВА, “Саха сирэ” хаһыат, edersaas.ru