Бүгүн Дьокуускайга Саха тыйаатырын саалатыгар өрөспүүбүлүкэ бааһынай хаһаайыстыбаларын уонна кэпэрэтииптэрин салайааччылара муһуннулар. Барыта 143 киһи, ол иһигэр 95 дэлэгээт, Бааһынай хаһаайыстыбалар уонна тыа хаһаайыстыбатын кэпэрэтииптэрин ассоциациятын отчуоттуур-быыбардыыр уопсай мунньаҕар кэлбиттэр.
edersaas.ru
Бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев эҕэрдэтин кэнниттэн АККОР бэрэсидьиэнэ Валерий Ефремов ассоциация 2013-2017 сс. үлэтин отчуотун иһиттилэр. Маны сэргэ «Тыа сирин дьахталларын хамсааһына» уопсастыбаннай тэрилтэ аатыттан Зарема Бочкарева уонна өрөспүүбүлүкэ эдэр фермердэрин хамсааһынын лидерэ Александр Фомин эмиэ отчуоттаатылар.
Эрдэттэн биллибитин курдук, АККОР бэрэсидьиэнин саҥаттан талыыга тыа хаһаайыстыбатын уонна ас-үөл бэлиитикэтин миниистиринэн үлэлии сылдьыбыт, билигин «Туймаада» хампаанньа генеральнай дириэктэрин солбуйааччынан үлэлиир Александр Артемьев кандидатурата АККОР сэбиэтин мунньаҕар туруоруллан турар. Уопсай мунньах кыттыылаахтарыттан эмиэ хас да киһи өйүүллэрин биллэрэн тыл эттилэр. Ол иһигэр Ньурбаттан төрүттээх Дьокуускай эдэр фермерэ Леонид Чусовской сүр баттаппыт быһыылаах, экс-миниистир туһатыгар туораан биэрэрин биллэрдэ. Эрдэ В.Н.Ефремов бэйэтин оннугар кинини хаалларар баҕалааҕа иһиллибитэ. Бу мунньахха атын кандидатура туруоруллубата. Инньэ гынан А.Е.Артемьев биир санаанан АККОР саҥа бэрэсидьиэнинэн 4 сылга талылынна.
Валерий Ефремов боломуочуйатын кытта АККОР былааҕын уонна бэчээтин Александр Артемьевка туттарда
«Итэҕэлгит иһин махтанабын, – диэтэ Александр Еремеевич. – Биһиги иннибитигэр – быһаарыллыахтаах боппуруос элбэх. Соҕотоҕун кыайбаппын өйдүүбүн. Кэпэрээссийэни сайыннарар-тэнитэр инниттэн эһиги кыаххытын түмүү – мин инники соругум. Бааһынайдар уонна кэпэрэтииптэр диэн арахсыбакка, биир санаанан үлэлиэхтээхпит».
Василий НИКИФОРОВ, «Саха сирэ» хаһыат, edersaas.ru