Биһиги өрөспүүбүлүкэбитигэр, ордук Дьокуускай куоракка электроннай өҥө күүскэ тэнийэн эрэр. Бааҥҥа киир, МФЦ-га бар – барыта электроннай уочарат.
Анивера Акимова, «Саха сирэ» хаһыат, https://edersaas.ru/
Оттон интэриниэттээх, үлэ үөһүгэр сылдьар дьон, биитэр дьиэҕэ олорооччулар поликлиникаҕа, нолуок сулууспатыгар, социальнай управлениеҕа интэриниэт нөҥүө сайаапка түһэрэллэр, докумуоннарын ыытар, толуон ылар буоллулар.
Билигин Элбэх функциялаах киин 400-тэн тахса өҥөнү оҥорор. Ол курдук, сир, дьиэ-уот боппуруостарыгар, социальнай эйгэҕэ, предпринимательствоҕа, пааспары ылыыга, уларытыыга уонна булт эйгэтигэр. Ону таһынан, оҕо төрөөһүнүгэр, элбэх оҕолоох дьиэ кэргэҥҥэ, инбэлииттэргэ аналлаах, бэйэ дьыалатын арынарга, сир учаастагын бэйэ аатыгар оҥорторорго комплекснай өҥөлөр бааллар.
Элбэх функциялаах киин аһыллыаҕыттан, кыһалҕалаах дьон хас даҕаны сиринэн сүүрэкэлээн докумуон хомуйан эрэйдэммэккэ, барытын биир сиргэ оҥорторор кыахтаннылар. Ол курдук, 2010 сыллаахха 37 тыһыынча кэриҥэ киһи киин өҥөтүнэн туһаммыт эбит буоллаҕына, МФЦ исписэлиистэрэ билигин күннэтэ 2,3 тыһыынча сайаапканы көрөллөр.
Анивера Акимова, «Саха сирэ» хаһыат, https://edersaas.ru/